Thaw u MDC barim da ka MCSEF ha Mawhati ban peit ïa ka eh ka shon ki paidbah

Nongpoh, Jymmang 15: Hadien ka jingkhot jong ki riew rangbah naka thaiñ Mawhati ïa u Bah CB Syiem u ba dei uwei naki rangbah bala ih haka politik u ba la long teng ruh u MDC ka Nongpoh Constituency bad ruh u CEM ka KHADC haki snem kiba la leit noh, u Bah CB Syiem ryngkat bad ki paidbah haka jingïalang kaba la long haka 14 tarik kila rai ban thaw syndon ïa kawei ka kynhun trei mon sngewbha kaba la tip kum ka Mawhati Constituency Socio & Economic Forum ban ïalam hi da u Bah CB Syiem kum u President.
Ha katei ka jingïalang kaba la poi ruh da ki spah ngut ki riew rangbah jong ka Mawhati Constituency naduh ki longkmie bad ki khun samla kila rai ban thaw ïa katei ka kynhun trei mon sngewbha naka bynta ban peit ïaka eh ka shon jong ki paidbah kumba ka Mawhati Constituency ka dei kawei naki constituency kaba dang sahdien tam haka thaiñ Ri-Bhoi.
Haba kren sha ki lad pathai khubor u Bah CB Syiem u la pynpaw ba ka jingthaw ïa katei ka kynhun ka dei ruh ka jingai jingmut lang jong kiba bun ki riew rangbah ha katei ka thaiñ shuwa ban poi sha ka politik bad katei ka kynhun kan ym ktah ïano iano bad kadei ruh ka kynhun trei mon sngewbha kaba la khot la wer ruh ïaki paidbah, ki kynhun Balang bad ki nongtrei sorkar ban don ha katei ka kynhun ban peit ïaka jingeh jong ka Mawhati Constituency.
U la ong ruh ba la thaw ïa katei ka kynhun da ka mynsiem kaba sngewkhia hadien ka jinglong jingman jong ka Mawhati ka long kaba dang sahdien shisha namar ki paidbah ki iohi bad bishar ïaka jingiehnoh khunswet jong u MLA u ba ki paidbah kila jied bad donkam ka jingkylla ha katei ka thaiñ, watla u MDC u la pyrshang katba lah ban trei hynrei namar ka jingbym kot bor um lah ban pynbiang lut ïaki jingdonkam jong ki paidbah ka Mawhati.
U la ong ba u ioh ïa ka jingkhot na ki riew rangbah ka thaiñ ban sdang ïa ka kam kum u nongïalam da kaba u la kynthoh jur ïa ka jingbym treikam bad iehnoh khunswet u MLA ba mynta ïa ka constituency hi baroh kawei kaba la buh jingeh shi katdei ïa ka constituency hi baroh kawei haba iadei bad ka roi ka par bad kiwei kiwei ki jingdonkam jong ki paidbah.
Ki nongkitkam jong katei ka Forum ki kynthup ïa u Bah CB Syiem kum u President, u Bah Ojrin Mangu, Lowis Umbah bad u Tes Syiem kum ki Adviser, u Bah PW Umbah, Thomas Muktieh Jos Syiem bad u Jwes Umbah kum ki Working President, u Hopingstone Masharing, O Pangcho, Morning, Dit Mangu kum ki Vice President, u Army Shadap kum u General Secretary bad kiwei kiwei.