Thaw noh da ka HLTAA ba ïai kyrduh um manla ka por ha nongbah Shillong, dawa ka HYC

Shillong, Nohprah 16: Ka seng Hynñiewtrep Youth Council (HYC) ha ka sngi baar ka la dawa na ka sorkar jylla ban thung da ka High-Level Technical bad Administrative Audit (HLTAA) ïa ka jingsam um ha Shillong hadien ba ka la don ka jingkyrduh um kaba shyrkhei bha na ka jingkynnoh ba ka don ka jingbym biang ha ka jingpyndait ïa ki pipe um bad ka jingbym shimkhia ki bor kiba dei khmih ha kaba ka la wanrah ka jingeh kaba khraw ia ki nongshong shnong kaba la iaid mynta la kumba 7 sngi eiei.
Na ka liang ka seng ha ka shithi kaba la aiti ha u Myntri ka tnat PHE u Marcuise N Marak ha ka sngi baar, u vice president ka HYC u Francis G Mawlong ula ong, “Ngi kyntu ba dei ban shimkhia bad tuklar mardor ban bthah da ka high-level technical bad administrative audit ïa ki tiar ki tar bad ki jingtei ha ka jingsam umbam umdih ha Shillong, ban sdang buh noh da ka por ban bujli ïa ki pipe kiba la rim bad sarang, ban tynrong ïa ka jingkitkhlieh ïa ka jingïai bteng ban don ki jingduna bad ban shim ïa ki sienjam ban leh da kaba tyngeh bad ban pynthikna ba kan don ka jingpynwandur lypa ban lait na ka jingmih biang ka jingthud.”
Haba pynpaw ïa ka jingsngewkhia halor kine ki jingthut ba manla ka por halor ka kam sam umbam umdih, na ka liang u Bah Mawlong ula ong ba kane ka long kum ka jingpang kaba la rim kaba ktah pat ïa baroh.
“Baroh ki shnong ki la shong tyrkhong khlem um da ki bun bun sngi kaba la wanrah ïa ka jingeh kaba khraw ïa ki nongshong shnong kynthup ïa kiba la noh ka rta, ki khynnah bad kiba pang ba shitom bad khamtam kito ki longïing kiba sah sha ki jaka ki bym lait ïaid kali kiba shem jingeh ruh ban thied um.”
Na ka liang ka HYC ka la ong, “Kane ka jingthut ka jingpynpoi umbam ka dei na ka daw ba shu ieh kumto da ki bun bun snem, ka rukom plan bad rukom shna ka bym biang bad ka jingbym don ka jingbuh jingkheiñ kaba biang hapoh ka tnat PHE.”
Shuh shuh na ka liang u Bah Mawlong u la banjur ruh da kaba ong ba ka jingshna maramot tang dep rukom ka la long ka jingmlien bad ïai bud kawei hadien kawei pat ka jingthut treikam kaba pyni ïa ka jingbym lah ban wanrah ïa ka jingtrei kaba paka na ka bynta ka jingmyntoi ki paidbah ba bun.
U Bah Mawlong u la ong, “Ban ïoh ïa ka um kaba khuid bad kaba thikna ka dei ka hok jong baroh. Ka jingthut ka jingtreikam ym tang ba ka pynthut ïa ka jingshakri hynrei ka pynduh noh ruh ïa ka jingshaniah bad mih ruh bun ki jingkylli halor ka rukom treikam, ka jingpyndonkam hok ïa ka pisa bad ka jinglah treikam bha jong ka tnat.”
Halor kane, na ka liang ka HYC ka la maham ruh ba lada bteng kane ka rukom treikam ka seng kam banse ban ïaid noh da ka lynti ka aiñ, khnang ban beit ki rukom treikam jong ka tnat.