Thaw lad ka Sorkar MDA ban pynkiew tulop 100% ïa ki nonghikai skul SSA

Shillong, Risaw, 15: Ka Sorkar Jylla ka la kular ban wad ïa ki lad ki lynti na ka bynta ban pynurlong ïa ka jingdawa pynkiew tulop shispah persen da ki nonghikai skul SSA bad ban pynskhem noh ïa ka kam kaba ki trei.
U Myntri ka tnat Pule Puthi ka Sorkar Jylla u Rakkam A. Sangma u la kyrpad ïa ki nonghikai skul SSA kiba pynlong ïa ka jingïakhih ba khlem pud sngi ha nongbah Shilong ba kin pyrkhat lem ïa ka bha ka miat jong ki khynnah da kaba leit phai biang sha ki saw kynroh jong ka kamra klas.
Ha ka jingïakren bad ki lad pathai khubor, u Rakkam u la ong ba ka rai ban kyntiew ïa ka tulop jong ki 13000 hajar ngut tam ki nonghikai SSA ka lah ban ym urlong noh mynta mynta namarba ka Sorkar ka don hapdeng ka jinghiran pisa.
“Hynrei, ngi dang wad ïa ki lad ki lynti. Ngi la shong kawei ka jingïalang ha ka taiew baladep bad u Myntri Rangbah u Conrad K Sangma. Ngin sa shong biang sa shisien. Ngi ladep ban btah ïa ki ophisar ba kin khein kin diah (kumno ban pynurlong ïa ki jingdawa jong ki nonghikai skul SSA ha Meghalaya),” u la ïathuh.
Haba kyntu ïa ki nonghikai ba pynlong ïa ka jingïakhih ba khlem pud sngi ban leit phai noh sha ki skul, u Myntri ka tnat Pule Puthi u la ong, “nga sngew mong ba ki nonghikai jong ngi ki hap ban shong ha surok, ne ha madan ïalehkai hynrei ha kawei pat ka liang nga sngewsih na ka bynta ki khynnah skul, kiba dei ban ïoh jinghikai. Mynta ba ki skul ki la sdang biang, nga kyrpad ïa ki nonghikai ban leit phai biang sha skul, ban pyrkhat lem ïa ka lawei jong ki khynnah.”
Ki la mih ruh ar kynhun hapdeng ki nonghikai skul SSA. Ka Meghalaya SSA Schools Association (MSSASA) ka la ai por ar bnai ïa ka Sorkar Jylla ban wanrah ïa ka polisi ban pynskhem ïa ka kam jong ki nonghikai SSA, katba ka All Meghalaya SSA School Teachers’ Association (AMSSASTA) ka la pynlong ïa ka jingïakhih ba khlem pud sngi mynta la 15 sngi ban dawa ba dei ban kyntiew ïa ka tulop 100 percent jong ki nonghikai.
U Myntri u la ong, “baroh ar tylli ki jingdawa ki long kiba shongnia hynrei ban don ka jingïapait arliang hapoh ki nongtrei kam long kaba bha. Ngi sngewthuh namarba ki dei ki nonghikai jong ngi, ki dei na kajuh ka longiing, ki dei ban don ruh ïa ka jingkitkhlieh na ka bynta ka pule ka puthi jong ki khynnah.”
Ha kaba ïadei bad ka jingkynthoh jong ka Liang Pyrshah ba ka Sorkar kam shym la khot ïakren ïa ki nonghikai kiba pynlong jingïakhih, u Rakkam u la ong, ka Sorkar ka ladep ban ïakynduh ïa ki bad ka jingkhang ka plie borabor ban ïasyllok. Hynrei, ka Sorkar ka hap ban buh shwa hakhmat ïa ka jingjia shlei um ha rilum Garo kaba la dkhat jubor haduh 17 ngut ki mynsiem briew.
“Mynta ba nga la wan phai, nga lah ban ïakynduh ïa ki ha kano kano ka por, nga don hangne ban shakri ïa ki paidbah,” la ong u Myntri.