Nongpoh, Risaw 10: Kum ka jingpynkhreh ïaka elekshon 2023 sha ka iing dorbar thaw aiñ ka jylla, ki 2 tylli ki seng riewlum ba kynthup ïaka Hill State Peoples Democratic Party (HSPDP) lem bad ka United Democratic Party (UDP) haka jingïalang kaba la long mynta la sngi ha Bhoirymbong kila shim ïaka rai ban thaw syndon da ka kynhun synrop bala tip kum ka Regional Democratic Alliance (RDA) ban pynkhreh ïaka elekshon 2023.
Kumba long haduh mynta ka party UDP bad HSPDP haduh mynta kam pat don kyrtong ha Umroi Constituency ban ïakhun naka bynta ka elekshon MLA ha u snem 2023 bad haduh mynta kim pat shim rai ban pynieng kyrtong lane ïano ba kin leit kyrshan ha ka elekshon ban wan na Umroi Constituency kaba dei ruh ka constituency bala mih khmat da u Bah George B Lyngdoh MLA jong ka Congress u ba la leit ban pynïasoh noh bad ka party AITC.
Ki nongkitkam bad ki nongïalam jong ka RDA bala jied ha katei ka sngi ki kynthup ïa u Bah Bah PB Sylliang, Vice Chairman-Bah Peter Madur, Secretary-Bah Ailong Pariat, Asst Secretary Bah Pynskhem Sun, Organising Secretary – Bah Lumlang Lamarai lem bad 30 ngut ki dkhot jong ka executive committee. Lyngba katei ka jingïalang kila shim ruh ïaka rai ban lum da ka General Meeting jong ki nongkyrshan ha kine ki sngi ban wan, ban sa pynthikna syndon ïa u kyrtong ba kum ka kynhun synrop kan sa pynieng lane ban ai jingkyrshan ïa uno uno u kyrtong ha kane ka elekshon ban wan.
