Shillong, Nailur, 04: U Myntri Rangbah ka Jylla u Conrad K. Sangma ha ka sngi Balang u la ong ba ka Sorkar ka la thaw ïa ka District Level Committee ban bishar ïa ka jyllei jong u drok bad ban pyntreikam ïa ka Meghalaya Residents Safety and Security Act (MRSSA), 2016.
“Ngi la thaw ïa ka komiti ha ka District Level kaba sdang na Shillong, Tura bad Jowai, ka ban peit bniah ïa kine ki bynta ba kynthup ïa ka jingjyllei jong u drok, ka jingsumar bad kiwei kiwei namarba kane ka dei ka jingma kaba ngi baroh ngi hap ban ïatreilang ban ïaleh pyrshah,” ong u Conrad ha ka jingïakren bad ki lad pathai khubor.
U Conrad u la pyntip ïa kane halor ka jingkynnoh dang shen da ki seng sainpyrthei kiba don ha ka Liang Pyrshah ba ka NPP kaba bat ïa u lakam synshar ka la pyndonkam da ka pisa be-aiñ na u droks, u dewiong bad ki jingtrei kontrak ban khwai ïa ki MLA jong kiwei pat ki seng saiñpyrthei.
U Mukul Sangma, uba long u nongïalam jong ka TMC bad Myntri Rangbah barim, u la byrngem ban thoh sha u Myntri Rangbahduh ka ri, khnnag ba un tuklar halor kane ka kam.
Da kaba pynpaw ba ki jingkynnoh ki long ki bym don nongrim satia, u Myntri Rangbah u la ong, “ka long kaba sngewsih shibun ba kum kine ki nongïalam kin hiar haduh kane ka kyrdan bad kin teipop pyrshah ïa kiwei pat ki nongïalam. Ka long kaba sngewsih shibun.”
“Ha ka jingshisha ngi dang shu pynbna ïa kawei ka komiti ban khlieh da ki ADC jong ki district bapher bapher kynthup ïa ka Shillong ha kaba ngin don ïa ki dkhot na ki shnong bapher bapher, ki rangbah shnong bad ki Development Committee bad kumta ter ter. Ka kamram kam long tang ban shu peit ïa ka jingjyllei jong u drok hapoh ki shnong ki thaw hynrei ban buddien ruh ha kaba ïadei bad ka jingpyntreikam ïa ka MRSSA bad ban peit ïa ki bynta jong ka jingkhuid jingsuba ha ki shnong ki thaw bad kumjuh ruh ïa ki mat kiba ïadei bad ka umbam umdih,” u la ong.
“Mano mano ruh ki lah ban kynnohhynrei ka long kaba sngewsih shibun ba kum ki nongïalam kiba don ka jingkitkhlieh kin kren ïa kum kine ki jait ktien khlem kano kano ka nongrim ne kano kano ka jingpynshisha. Ka long kaei kaei kaba sngewsih shisha bad ka jingkynnoh pyrshah ba ki riewshimet ki donkti ha u drok, kumba nga la ong, ym tang ba ka ïalam bakla ha ka imlang sahlang hynrei ka long pyrshah ïa ka ri bad kaba lah ruh ban ktah,” ong u Conrad bad bynrap, “ki kam kiba bun ngi la leh ban pynthikna ban kem bad ban pynsangeh ïa ka wan rung jong u drok kumba phi la ïohi ha kine ki lai snem ba la leit noh.”
