Thaw ki nongai dawai kynbat da ka Synjuk ha SWKH, plie ïa ka Clinic ha Mawmerang

Mawkyrwat, ‘Nailur, 09: Ka long ka jingkmen kaba khraw ïa ki paidbah ka dong ka thaiñ, khamtam ïa kiba pang ba shitom, namar ha ka sien kaba nyngkong ki nongai dawai Khasi jong ka South West Khasi Hills District kiba don kumba 87 ngut – kynthup ïa ki 40 ngut ki nongai dawai, 20 ngut ki nongkhem (bun na ki ki dei ki longkmie), bad kumba 40 ngut ki nongthung bad nongai dawai – ki la ïa snoh kti lang hapoh kawei ka shatri kaba ki la jer kyrteng ka ‘Seng ki Nongsumar Dawai Khasi Nylla Association’ ne SNDKNA ban ïa trei ryngkat na ka bynta ka jingmyntoi jong u paidbah lyngba ka jingsumar da ki dawai Khasi.
Ka jingpynkmen kaba kham khraw ka long ba kine ki nongai dawai Khasi kin ïa shakri lang ha kajuh ka jaka, ha ka shnong Mawmerang, South West Khasi Hills District kaba jngai kumba 10km na Mawkyrwat bad marjan bad ka skul JNV. Kane ka jaka la tip kyrteng kum ka ‘Traditional Clinic’, ha kaba yn pynlong ïa ka jingsumar man ka sngi, bad yn don ar ngut ki nongai dawai bad ar ngut ki nongkhem kiba lah ban ai jingsumar ïa kiba donkam jingïarap.
Haba kren ha ki lad pathai khubor, na ka liang jong u President jong ka Seng ki Nongsumar Dawai Khasi Nylla Association, u Bah Gopstan Marweiñ u la pyntip ba ïa kane ka seng la dep ban register bad ka la ïoh ruh ïa ka jingithuh. U la ong ruh ba ïa kane ka Traditional Clinic la kyrshan bad la bei pisa da ka Sorkar Jylla lyngba ka tnat Bio Resources Development Centre (BRDC).
U la pynpaw ruh ba watla ym pat plie pura ïa kane ka jaka sumar, hynrei ka jingai jingsumar la sdang noh naduh mynta khnang ba ki paidbah kiba wan wad jingïarap ne jingsumar kin tip bad kin ïoh jingmyntoi.
Ym tang kata, ki pyntip ruh ba ha kane ka jaka sumar yn shimkhia ban sumar ïa baroh ki jingpang – kynthup ruh ïa kiba pang Cancer, Ulcer, HIV bad kiwei de ki jingpang. Nalor kata, ki nongkhem bad ki nongsop dawai kiba don ka jingtip tynrai kin shakri ruh ïa ki longkmie ha ka por ba ar met, ha ka por ba pynkha khun, ban sumar ïa kiba kheiñ shyieng, mynsaw bad kiwei kiwei.