Jowai, Jylliew 11: Ki ar tylli ki kynhun sengbhalang kynthup ïa ka Warjaiñtia Students’ Union (WjSU) bad ka Jaiñtia Youth Federation (JYF) ki la thaw noh da ka “Jaiñtia Joint Alliance” (JJA) ha ka jingïalang kaba la dep pynlong ha ka 7 tarik u Jylliew ha ophis ka JYF kaba don ha Jowai.
Kane ka JJA kan trei na ka bynta ka bha ka miat jong ka Ri-Lum Jaiñtia hi baroh kawei naduh ki bynta ba khappud bad ka Bangladesh thaiñ Amlarem, na Pyrdiwah haduh Rattachera jong ka East Jaiñtia Hills.
Ki nongïalam ka Jaiñtia Joint Alliance ki kynthup ïa u Ombormi Tariang (JYF) kum u Chairman, u Heartcasing Dkhar (WjSU) kum u Co Chairman, u Everest Langstang (WjSU) kum u Secretary, u Oswald B Nampui (JYF) kum u Joint Secretary, la jied ruh ïa u ma Alban K Gashnga, Chief Adviser jong ka WjSU kum u nongai jingmut ba kongsan.
Kane ka Alliance kan trei ïa ki kam ba hakhmat eh kata ban pynbha pynmiat ïa ka rukom ai jingsumar ha ka liang ka koit ka khiah, ka pule ka puthi, ki kam ïalehkai sports, ki kam kiba ïadei bad ka imlang ka sahlang bad kiwei de ki kam ba bha hapoh ka bri u Hynñiewtrep.
