Shillong, Ïaiong 15: Ka All India Trinamool Congress (AITC) kala thaw ha ka sngi ba-ar ïa ka Trinamool Congress Students Union (TCSU) ha Meghalaya da ka jingthmu ba kane ka kynhun kan khmih ïa ki kam kiba ïadei bad ki samla jong ka Jylla.
U Samla Bansharailang Pyngrope ula shah jied kum u President ka TCSU bad u Changkam Sangma kum u Vice President.
Haba kren sha ki nongthoh khubor, u samla Bansharailang ula pyntip ba da ki spah ngut ki samla pule kila noh synniang ïa ki tin sop ïing sha ki 14 tylli ki Shnong ka thaiñ Mawkynrew, kiba shah pynjulor ha ka eriong bad u lapbah.
“Ka thong jong ka TCSU hi ka long ban khmih ïa ki kam jong ki Samla hapoh ka Jylla khamtam haba phai sha ka pule dangle bad kum ka Ri kaba don bun eh ki samla, ka long kaba donkam ban pynjanai ïa ki kam ha ka pule dangle hapoh ka Jylla bad ka Ri baroh kawei” ula ong.
Une u samla ula ong ba ka long kaba donkam ban pynjanai ïa ka pule dangle naduh ki shnong ki thaw hapoh ka Jylla khnang ba ki Khynnah kin ïoh ïa ka jinghikai kaba kynsai naduh kaba sdang.
Ula ong ruh ba ki samla ka Jylla ki don ïa ka kamram ha kaban pynthikna ba baroh ki Khynnah ki dei ban ïoh ïa ka jingnang jingstad ba kumjuh khnang ba kin iatip ïa ka jingkylla ka suin bneng, ka jingnang bun paid bad ka jing bym ïohkam ïohjam.
Une u Nongïalam ka TCSU ula kyrpad ïa ki samla ka Jylla ba kin wan pyniasoh sha ka TCSU khnang ba ryngkat lang yn lah ha kaban ïakhun ïa ki jingeh kaba ki samla jong ka Jylla ki ïakynduh.
