Shillong, Naiwieng 9 : Ka kynhun myntri kaba la ïa kynduh mynta ka janmiet ka la mynjur ïa ka jingwanrah ka sorkar ïa ka Meghalaya Medical Services Recruitment Board (MMSRB) naka bynta ban pynsted noh ka jingthung kam ïa ki 500 ngut ki doktor hapoh kine ki ar- lai bnai.
Haba pyntip ïa kane hadien ba la wai ka jingïakynduh jong ka kynhun myntri u Myntri Rangbah ka jylla u Conrad K Sangma u la ong ba ka kam ka la sahteng la kham slem namar ki don haduh 176 tylli ki kam ba lait na ka bynta ki doktor specialist bad 366 tylli na ka bynta kiwei pat ki doktor. Ka daw ka long ba ka MPSC ka la bunkam palat bad kam lah ban pynlong ïa ka interview ban thung kam ha kine ki kam ba lait naduh u snem 2017.
“Hooid kawei na ki daw ka dei ka khlam COVID, hynrei wat la katta ki dang don sa kiwei ki daw namar ka hap ban pynlong ïaki eksamin interview kam ïa baroh ki tnad treikam ka sorkar. Kumta ka la buh ha ka jingeh ïa ka MPSC ban pyndep kloi ka jingthung kam kumta ban pynsted ïa kane ka jingthung kam ïa kine ki 500 tylli ki kam kiba lait, la rai ban thung noh da kane ka MMSRB”, ong u myntri rangbah.
Nalor kata, kane kam mut ba ym don doktor kiba trei hynrei ki trei hi tangba ka long da ka kontrak ne thung kam shipor ïaki kat kum ka 3F kumta hap ban pynskhem pat ïa ki namar ka rta jongki ka la nang ïaid bad dei na kane ruh ka daw ban sted ka kam la thaw da ka MMSRB.
“ Kane ka MMSRB kan pynkhreh nadong shadong ban pynïaid shakhmat ïa ka jingthung kam ïa ki doktor bad la rai ruh ba dei ban pyndep hapoh ar lane lai bnai” ong biang u myntri rangbah.
Halor ka jingkylli hato kane ka Board kan ïai bteng ban peit ïa ka jingthung kam ïa ki doktor nangne shakhmat u myntri rangbah u la ong ba ka sorkar kan sa bishar shwa ïa ka rukom treikam shwa ba kan shim ïaka rai la yn bteng ne pynsangeh noh hadien ba la pyndep ka jingthung kam ïa kine ki 500 ngut.
U la ong ka kam jongka Board ka long ban sdang thungkam bad pynskhem noh ïa kito baroh kiba la thung kat kum ka 3F lane casual.
“ Namar mynta la san snem mynta ka MPSC kam lah ban pynlong ïa ki interview kumta ka thong jongka Board ka long ban pyndep kloi ïa ka jignthung kam bad hadien kane ka sorkar kan sa bishar bniah ïa ki rukom treikam ka board lada i donkam kan sa rai ban bteng ne ban ym bteng shuh ruh” ong u Conrad.
“ Ngi ïohi ba ka MPSC ka la khia kam palat namar ka hap ban pynlong bun ki eksamin thungkam bad kumta kam lah shuh ban leh sted bad kane ka ktah pat khamtam ïa ki doktor. Hooid baroh ki jingthungkam ki long kiba dokam hynrei ïa ki doktor ka kham donkam namar ki dei kiba hap ban peit ïa ka koit ka khiah na kata ka daw la donkam ban thung kam kloi bad pynskhem ïa kito kiba la trei lypa ha ka kam ruh” ong u myntri rangbah.
