Jowai: Ka Meghalaya Commercial Truck Owners And Drivers Association (MCTODA) Jaintia Unit mynta ka sngi kala khot pynlong ïa ka jingïalang paidbah (General Meeting) jong ka ha Hynñiew Mer, West Jaiñtia Hills District na ka bynta ban thaw noh da ka Joint Action Committee hapdeng ki seng Trok, khnang ba yn lah ban pymim kamai ïa ki briew lajong.
Ha kane ka jingïalang la khot lang ïa baroh ki seng Trok hapoh ka Jylla, khamta ïa ki lai tylli ki seng kata ka Meghalaya Commercial Truck owner and driver Association, ka Jaiñtia Hills Truck owner Association bad ka All Jaiñtia Cement & Clinker Transport Association. Ha kane ka jingïakynduh lang la rai ban thaw noh da ka Joint Action Committee, bad kane ka Committee kan trei na ka bynta ban wad ki lad ki lynti ban ïoh pynrung ïa ki kali jong ki trai ri trai muluk kiba dei napoh jong ka jylla Meghalaya, ban ïoh kit ïa ki mar na ki Factory bapher bapher, khamtam na ki Coke bad ki Cement Factory. Ka jingthaw ïa kane ka JAC ka long ban pynduh ïa ka jingleh donbor jong ki katto katne ki riew shim kabu, kaba la wanrah ka jingduhnong bad ka jingkyrduh kam kyrduh jam jong ki trok trai ri.
Ha kane ka sngi la jied ruh ïa ki nongkitkam jong kane ka JAC kiba kynthup ïa u Chairman ma Biangmon Shylla, u Vice Chairman bah Lumlang Mawnai, Secretary ma Wanshwa Nongtdu bad Treasurer bah Wallanstar Warlarpih.
Mynta hi ka sngi ka JAC kala rai ban ai da ka jingthoh bad ban leit ïakynduh ïa ki Association jong ki coke factory ban ïa pynbeit ïa ki kam bad ki dor ki mur bad hadien pat kin sa ïa pynbeit bad ki Cement Factory.
