Thaw histori ka NPP ha Meghalaya la lah ban synshar hi marwei kiew 31 ngut ki MLA

Shillong, Nailar 19 : Kat nang shah beiñ shah khoh, shah kynnoh lai phew jait katta pat ka National People’s Party (NPP) ka la nang kiew rasong ha Meghalaya namar mynta lei lei ka la lah ban synshar hi marwei da ka jingwan pynïasoh sa lai ngut ki MLA ka Congress mynta ka sngi ha ophis treikam thymmai ka party ha Bivar Road Shillong.
Kine ki lai ngut ki MLA ka Congress kiba la wan ban pynïasoh sha ka NPP ki dei u Dr Celestine Lyngdoh MLA ka Umsning, bah Charles Marngar MLA ka Mawhati bad bah Gabriel Wahlang MLA ka Nongstoin. Mynta ka NPP ka la kiew ka jingbun paid sha ka 31 ngut ha ka ïing Dorbar Thawaiñ kaba 59 ngut ki MLA bad ka Congress ka sah sa tang uwei u MLA uba dei u bah Ronnie Lyngdoh MLA ka Mylliem Constituency.
Ka Liang Pyrshah mynta ka don sa tang 10 ngut ki MLA kata 5 ngut ki MLA ka TMC, 4 ngut ki MLA ka VPP bad 1 u MLA ka Congress.
Hadien ba kine ki lai ngut ki la ïoh ka jingmynjur bad jingithuh na u Lamphang ka Iing Dorbar Thawaiñ ka jylla u Thomas A Sangma ba ki lah ban pynïasoh noh sha ka NPP mynta ka sngi, ha ka por janmiet hi u National President ka NPP uba long ruh u Myntri Rangbah u Conrad K Sangma ha ka jingïadon lang u State President uba dei u Symbud Myntri Rangbah bah Prestone Tynsong, National General Secretary bad Symbud Myntri Rangbah ma Sniawbhalang Dhar, National Vice President bad MP Rajya Sabha u Dr W.R Kharlukhi lem bad ka jingïadon lang kiwei ki Myntri Sorkar, ki MLA, CEM, MDC bad kiba bun ki nongïalam jongka party, la pdiang sngewbha ïa kine baroh lai ngut sha ka ïing ka sem jongka NPP. Ia ka jingialang pdiang sngewbha iakine ki lai ngut ki MLA la pyniaid da u Prof D War Working President. La ai ïa ka jingkren pdiang sngewbha da u bah Hamlet Dohling Working President bad ïa ka jingkren ai khublei da u bah Clement President ka NPP Ri Bhoi District.
U National President u la ong ba kane ka dei ka sngi sah jingkynmaw ha ka histori jongka NPP namar da ka jingwan pynïasoh kine ki lai ngut ki MLA jongka Congress ka NPP ka la kiew ka jingbun paid sha ka 31 ngut bad ka lah ban synshar hi marwei ruh. “ Ngi sngewnguh bad ai khublei ïa kine ki nongïalam (MLA) kiba la wan ban pynïasoh bad ngi mynta ka sngi. Kane ka la nang ai mynsiem ïa ka party hynrei kaba kham kongsan ka long ban dang pynkhlaiñ ïa ka jingtrei shitom ban pynurlong ïa baroh ki jingkular ba la khlei hakhmat ki paidbah namar ka thong ka long ban shakri ïa ki paidbah bad kyntiew shuh shuh ïa ka jylla” ong u Myntri Rangbah da kaba ban shuh shuh “ Ka NPP ka sdang na ka jinglong rit bad mynta ngi la ïoh ïa kiba bun ki nongïalam hapoh ka party bad kine ki nongïalam ki dei kiba tbit ban kit bad ai ka jingshakri ïa ki paidbah bad ka jylla hi baroh kawei bad lyngba jong ki ka don ka jingkyrmen ïa ka party bad ïa ka jylla hi ruh”.
U la kyntait jur ruh ïa ka jingkynnoh jong u President ka MPCC u ma Vincent H Pala ba ka NPP ka pyndonkam da ka pisa beaiñ ban thied ne thong ïa ki MLA ka Congress. “ Ngam kwah ban kynthoh ïa kum kitei ki rukom kren tohmet bad khlem akor jong utei u nongïalam ka Congress hynrei kine ki paralok ki la shim ïa kane ka rai namar ki ïohi ba ka sorkar ka trei ban wanrah ïa ka roi ka par bad namar ba ki kwah ba ki constituency jongki ruh kin roi kin kiew kumta ki la shim ïa kane ka sienjam ban wan ïatrei lang noh bad ka NPP bad kumjuh ruh bad ka sorkar MDA. Shwa ba kin wan pynïasoh ruh la dep ïamir jingmut lang bha na ka bynta kumno ban trei bad kyntiew ïa ka roi ka par ha ki constituency jongki naduh ka jingkular ban ai CR& D Block ïa ka Mawhati, ki surok ïa ka Nongstoin bad ban kyntiew shuh shuh ïa ka Umsning ha baroh ki liang” ong u Myntri Rangbah.
“ Kumta kaei kaba u President ka MPCC u kren ka dei ka jingkren shimet jongu kiba ym long ki jingshisha bad kaei ka rai ba la shim ban pynïasoh sha ka NPP ka dei beit halor ki kam pynroi pynpar bad kiwei kiwei ki song jingïarap na ka bynta ki Constituency jong kine ki lai ngut ki MLA” ong biang u Myntri Rangbah.
Haba la kylli shuh shuh ïa u Myntri Rangbah ula ïathuh ba kine ki lai ngut ki MLA ki wan ban pynïasoh khlem kano kano ka jingbuh kyndon. Kumjuh ruh na ka liang kine ki lai ngut ki MLA ruh ki la phla ba ki khlem wan na ka bynta ka jingmyntoi shimet jongki, ne ki khlem wan na ka bynta ka shuki hynrei ki wan na ka bynta ka roi ka par jongki constituency bad kumno ban ïoh ai jingïarap shuh shuh ïa ki paidbah.
“ Kumba nga la ong ki don ar tylli ki bynta kawei ka dei na ka bynta ka party level bad kawei ka dei na ka bynta ka sorkar. Kaba nyngkong ka long ba ngi la ïakren shai kdar ba kim shym la wan na ka bynta ka jingmyntoi shimet jongki ne ban ïoh ïa kano kano ka shuki kumta shwa ban ïakren ki la kren shai kdar ruh ba ki khlem wan ban dawa ne ïakren na ka bynta ka jingmyntoi shimet jongki hynrei kan long beit na ka bynta ka jingmyntoi ki paidbah bad ka jingkiew jongka Constituency ha baroh ki liang kumta kam shym la don kano kano ka jingbuh kyndon” ong u Myntri Rangbah.
U la ong shuh shuh “ Hooid ha ki por ban wan ngin peit bad pyndonkam ïa ka jingtbit, ka jingshemphang bad ka jingkhraw pyrkhat jongki na ka bynta ka jingmyntoi jongki paidbah bad ka jylla”.
“ Nga sngewnguh eh shibun ïa ki namar ki wan ym na ka bynta ka jingmyntoi shimet jongki ne na ka bynta ka pisa ne shuki ym don kaba kum kata hynrei ki wan na ka bynta ka jingmyntoi jong ki constituency jongki namar ki thrang ban ïohi ïa ki jingkylla bad jingkiew jong ki constituency bad ki paid jongka constituency. Nga sngew hun eh ïa kata bad na kata ka daw nga la kular ba ngan ïatrei lang bad ki ban kyntiew ïa ki constituency jongki” ong biang u Conrad.
U National President ka NPP ula pynpaw ba u la kular ruh ban ai ïa ka Block na ka bynta ka Mawhati Constituency. “ Nga kular ba ngin wanrah ka jingkylla hapoh ka Mawhati lyngba kane ka Block bad kumjuh ruh ki surok khamtam ka surok na Sonidan shaduh Umsiang”.
U la kular ruh ïa u MLA ka Nongstoin Constituency ba un ai ïa ki projek bapher bapher khamtam ki surok ki ban pynïasoh ïa ka nongbah Nongstoin bad kiwei ki jaka sha West Khasi Hills. Na ka bynta u MLA ka Umsning ruh u Myntri Rangbah u la ong ba ka Umsning ka dei ka jaka jongka rep ka riang, bad ka donkam bha ban don ki jaka pynmih marbam ( Food Processing Unit). “ Ngi donkam ban pyrkhat kumno ban kyntiew ïa ka jylla khamtam ïa ka Umsning bad Mawhati kiba dei ki lynti ïaid sha Assam. U Dr Celestine u don shibun ki plan na ka bynta ka roi ka par hapoh ka Constituency jongu bad nga kular ba ki paid ka Constituency jongu kin ïoh jingmyntoi na kine ki jingthmu bad thrang wanrah jingkylla jong u MLA jong ki. Nga kular ba ngin ïatrei lang ryngkat ryngkat ban pynurlong ïa ki jingthrang jong phi”. ong u Conrad.
Haba kren ha ka jingïalang u State President bad Symbud Myntri Rangbah u bah Prestone Tynsong u la ong “ Mynta la pyndap ïa ngi da ka jingkmen khamtam ïa nga kum u state president namar ngam poi pyrkhat ba ngin poi sha kane ka kyrdan kaba ngi la ïoh ïa u number ban lah ban synshar hi marwei. Ha ka election MP kaba dang shu kut shen ngi la ïohi katno ki briew ki la kynnoh ïa ka NPP hynrei u Blei uba stad u don la ka jong ka plan na ka bynta ka NPP namar wat hapdeng kine ki jingeh bad jingïaleh mynta la poi sha kane ka thong”
“ Kum u President jongka NPP ha ka jylla nga kwah ban pyntip sha baroh bad wat sha ki seng saiñ pyrthei ruh ba ka jingkhang jong ngi ka dang ïai plie ïa kino kino kiba kwah ban pynïasoh la ka long ha kano kano ka por ruh. Ka jingkhang ka ïai plie beit. Kam pher wat lada shah kynnoh, shah kawang ktieh hynrei ka jingshisha ka paw ba kane ka sorkar ka dei ka sorkar kaba trei bad thrang ban wanrah ki jingkylla hapoh ka jylla bad ngin dang ïai bteng ban trei ban kiew ka jylla” ong u bah Prestone.
Da kaba ther ïa kito kiba kynnoh ïa u Myntri Rangbah kum uta u kynrad uba triem ban khring bad tuh ïa ki MLA, u bah Tynsong u la ong “ Nga ïohi ba ki don kiba byrngem ban kiew shaduh Supreme Court ruh, kam pher lada phi kwah ngin sa ïa pyni ïa ki jingshisha hakhmat katei ka ïing Bishar ba hakhlieh duh namar ngi long kiba la kloi tangba tang kawei nga kwah ban kren shai ba kane kam dei ka jaka ban ïaleh drama hynrei ka NPP ka don bad ïalam ïa ka sorkar ban shakri hok ïa ki paidbah” .
U la iathuh ruh ba hadien ka Dorbar Lyiur un sa hiar da lade sha baroh lai ki constituency kata sha Nongstoin, Umsning bad Mawhati ban ïakynduh bad ïamir jingmut da lade bad ki MLA lem bad ki nongïalam jong kitei ki constituency”.