Thaw histori ar tylli ki skul ha Ri-Bhoi ka sien ba nyngkong ba ki ïoh rung ha ka Top-20

Nongpoh, Ïaïong 07: Ka Ri Bhoi District ka la ïoh ka burom kaba khraw hadien ba arngut ki samla pule, ka Lasara Pynbiang Nongbri na St. Michael Higher Secondary School, Umsning bad ka Daiakmen I Ka Talang na Ferrando Higher Secondary School, Umroi Nongrah, ki la lah ban rung ha ka thup Top 20 jong ka eksamin SSLC 2026 bala pynbna da ka MBOSE mynta ka sngi kaba long ruh ka history ban sah jingkynmaw ïa kitei ki 2 tylli ki skul namar ka dei ruh ka sien ba nyngkong ba ki khynnah kitei ki 2 tylli ki skul kin ioh rung ha katei ka thup.
Ka Lasara Pynbiang Nongbri ka la ïoh khur 568 marks bad ka la rung ha ka kyrdan ba 8, katba ka Daiakmen I Ka Talang, kaba wan na ka longïing kaba duk bad kaba la duh noh ïa la u kpa naduh dang khynnah, ka la ïoh khur haduh 555 marks bad rung ha ka kyrdan ba 20.
Ka jingïoh jong kine ki arngut ka la long kum ka jingpynshlur ïa kiwei pat ki samla ba wat hapdeng ka jingeh, ka dang lah ban urlong ïaka jingangnud lada don ka jingminot bad ka mon.
Ka Daiakmen, kaba sah ha shnong Umroi Umdohbyrthih bad kaba la ri da la ka kmie ka Kong Sabianka Talang, ka la long ka nuksa kaba shai ba ka jingduk kam dei ka jingkhanglad ïa ka jingjop. Ka kmie jong ka ka la pynpaw ïa ka jingsngewkmen bad jingïaroh ïa la ka khun, da kaba ong ba naduh dangrit ka Daiakmen ka ju long kaba minot ha ka jingpule bad kam ju klet ruh ban duwai bad pule Bible shuwa ban shim pat ïaka kot pule.
Ha kawei pat ka liang, ka Lasara ruh ka la pynpaw ïa ka jingsngewkmen kaba khraw bad ka la ong ba ka jingïaid lynti jong ka kam shym la long kaba suk, hynrei lyngba ka jingïarap jong ki nonghikai bad ka jingkyrshan jong ki kmie ki kpa, ka la lah ban poi sha kane ka kyrdan kaba khraw.
Kitei ki 2 ngut ki samla kila ai mynsiem ruh ïa kiwei pat ki samla ba kim dei ban pynlehnohei ïaka por ba kordor hynrei ki dei ban kitkhia ban minot lada ki kwah ban poi sha ka thong ha ka jingim jong ki.
Na ka liang ki bor pynïaid skul jong kine ki ar tylli ki skul, kynthup ïa ka Sister Aidalyne Sohkhlet, Principal St. Michael HSS, bad ka Sister Theresi Zoremsangi Principal ka Ferrando Higher Secondary School ryngkat ka Miss Lilain Mylliempdah ka nonghikai jong ka Ferrando HSS, ki la pynpaw ïa ka jingsngewkmen kaba khraw bad ai jingïaroh ïa kine ki samla. Ki la kdew ba kane ka dei ka sien kaba nyngkong ïa kine ki skul ban rung ha ka thup Top 20, kaba long ruh ka burom bad ka history ïa kitei ki 2 tylli ki skul ha Ri-Bhoi.
Kum ka jingpynshlur, ka St. Michael HSS ka la ai ruh ïa ka song pisa kaba T.20,000 sha ka Lasara ka ban long ruh ka jingai mynsiem ïa kiwei pat ki samla kiba dang pynkhreh ïa ki eksamin bapher bapher ba kin lehbha bad minot ha ki jingpule.