Thaw da ka High Level Peace Committee ban wanrah jingsuk ha Manipur dawa ka NESO ïa ka sorkar pdeng

Shillong Nailur, 12 : Ka North East Students’ Organisation (NESO) mynta ka sngi Palei, ka la kyntu ïa u Myntri Rangbahduh ka ri u Narendra Modi ban pynkut noh ïa ka jingsngap jar ka jongu bad ban leit jngoh ïa ka jylla Manipur, kaba la sakhi ïa ki jingïakynad bad jingïaumsnam kaba la neh mynta la 16 bnai.
Ha ka shithi kaba la phah sha u Narendra Modi bad u myntri kam pohïing ka ri u Amit Shah, ka NESO kala dawa ruh ban thung mardor ïa ka High Level Peace Committee ban wanrah ïa ka jingïapynbeit bad jingshongsuk ka ban neh ha ka jylla Manipur.
“Ngi kyntu ia u Myntri Rangbahduh ka ri ban pynkut noh ïa ka jingsngap jar ka jongu bad ban leit jngoh ïa ka Manipur ban bishar hi dalade ha madan ïa ka jinglong jingman bad ban ai jingïada ïa ki riewpaidbah jong baroh ar ki jaidbynriew khamtam ïa ki kynthei bad ki khynnah kiba la shah ktah na katei ka jingïakynad. Ki paidbah ka Manipur ki donkam ban ïohi ba ïa ka jingjynjar jongki dei kaba la pdiang bad ban shim ïa ka sienjam kiba donkam ban pynbeit noh ïa katei ka jingïaumsnam” la pynpaw u Chairman ka NESO u Bah Samuel B Jyrwa ha ka shithi kaba la phah sha u Narendra Modi.
Ula ong, ka jingsngap jar kaba la neh slem jong u Myntri Rangbahduh ka ri, u bym shym la leit ruh sha Manipur naduh ba la mih katei ka jingiakynad, kala nang pynjur ïa ka jingshem jingeh bad jingjynjar. Ka jingbym don ïa ka jingkhlaiñ, ki nongïalam bad ka jingtuklar kaba mardor kala ailad ïa katei ka jingïakynad ban nang jur bad kala nang kiew ka jingïaumsnam bad ki paidbah kila nang mad ïa ki jingjynjar.
“Ka jinglong jingman ha Manipur kala nang sniew bad ka dawa ban shimkhia mardor na ki kyrdan kiba ha khlieh duh jong ka sorkar. Ka jingbym lah ban pynbeit ïa ka jingïakynad kam pynthud tang ïa ka jinglong skhem jongka sorkar Manipur hynrei kala buh ruh ha ka jingma ïa ka jingsuk bad jingshngaiñ ha ka thaiñ shatei lammihngi baroh kawei. Ka NESO ka kyntu ïa ka Sorkar India ban leh eiei noh mardor bad ban shim ïa ki sienjam ban wanrah biang ïa ka jingsuk jingshngain ha ka jylla,” ong u Bah Samuel Jyrwa.
Ka NESO ka kyntu ruh ïa ka Sorkar India ba kan shimkhia mardor khlem da pynslem shuh bad ban shim ïa ki sienjam kiba biang ban wanrah biang ïa ka suk ka saiñ ha ka jylla.
“Ka NESO ka kyntu ruh ban thung ïa ka High Level Peace Committee, ka ban kynthup ïa ki nongmihkhmat na baroh ki jaitbynriew, ban plie lad ban shim ïa ka rai kaban wanrah ïa ka jingïapynbeit ka ban neh” la pynpaw u nongïalam ka NESO.
Ula ong ruh, ba kane ka jingïakynad kaba la slem bha kala wanrah ïa ka jingduh ïa ki jingim ïa kaba ym lah ñiew shuh, ka jingpynjot pynpra ïa ki jingdon jingem bad pynmih ïa ka jinglong jingman jong ka jingsyier ha kylleng jong ka jylla.
Ka NESO ka pynrem jur ïa kine ki kam ïaumsnam namar ki pynsniew bad ki long pyrshah ïa ki nongrim jong ka longbriew manbriew, jingsuk bad ka jingïalong kawei. Ka jingjur jong ki kam thombor, kynthup ïa ki jingjia ba la mih khubor dang shen, shaphang ki kam thombor da ki Drone bad ki Missile, kala nang pynsniew shuh shuh ïa ka jinglong jingman.
Kine ki buit kim pynjur tang ïa ka jingpynjot hynrei ki pynngam jylliew ruh ïa ka jingphiah hapdeng ki jaidbynriew, ban pyneh ban ïoh biang ïa ka jingsuk. Ka NESO ka ïeng bad kito baroh ki riewshimet bad ki longïing longsem kiba la shah ktah bad ka sngewsih ruh halor ka jingduh noh ïa ki mynsiem ba lui-lui.
U Bah Samuel Jyrwa ula pynpaw ba ka NESO ka ïengskhem na ka bynta ka jingsuk bad hok ha Manipur bad ka thaiñ shatei lam mihngi baroh kawei.
“Ngi ngeit ba ki kam thombor kam lah satia ban long ka lad ban weng ïa kano kano ka jingïakynad bad ngi wer ïa baroh ki jaidbynriew bad baroh kiba ïadonbynta lang ban pdiang ïa ka jingïakren bad ban ïatreilang ban pynneh pynsah biang ïa ka shongsuk. Ka NESO ka ïeng bad ka kloi ruh ban ïarap ïa kino kino ki jingpyrshang kiba tei ban pynbeit ïa ka jingeh kaba dang don mynta bad ban pynthikna ïa ka lawei kaba skhem bad kaba shngaiñ ia ka Manipur,” la ong u Chairman ka NESO.