Shillong, Risaw, 19: Ka Dorbar Shnong Nongrah ha ka janmiet sngi Saitjaiñ ka la pynlong ïa ka jingïalang thang mombati ban sngewlem halor ka jingshah pynïap u heprit Kyrshanbor Kharmudai, 7 snem ka rta ha ki riew thrangsnam.
Ha kane ka janmiet da ki spah ngut ki paidbah nongshong shnong jong ka shnong Nongrah bad na ki shnong ba marjan ki la ïashim bynta lang ha ka jingthang mombati sngewlem na ka bynta u heprit Kyrshanbor Kharmudai.
Kum ban shu pynkynmaw hangne ba u heprit Kyrshabor Kharmudai ula jah ha ka nohphai sngi 8 tarik, Risaw 2025 katba u dang ïalehkai hajan ka phyllaw iing bad ïa ka met jong u la lap ha ka sngi kaba bud, kata, ha ka 9 tarik, Risaw, 2025 narud surok ha Lum Rumnong jong ka khlaw Mawpat
Ha kane ka janmiet la ïa shim bynta lang da ki bahaiing hasem jong u heprit Kyrshanbor Kharmudai, ki nongkitkam shnong, ki dkhot ka Meghalaya State Commission for Protection of Child Right (MSCPCR), ka MLA jong ka East Shillong ka Dr. Ampareen Lyngdoh bad kiwei kiwei.
Ka tnat Pulit ka la thaw da ka Special Investigation Team (SIT) ban pynlong ïa ka jingtohkit kaba bniah khnang ban ïohkem ïa ki runar kiba donkti ban dkhat jubor ïa ka jingim jong u heprit Kyrshabor Kharmudai.
Haduh mynta, ki Pulit kim pat ïohkem satia ïa ki briew kiba donkti ban rahbor bad ban dkhat jubor ïa ka jingim jong u heprit Kyrshanbor.
