Thang mombati nyngkong eh ki doktor bad nongtrei ka NEIGRIHMS

Shillong, Nailar 16 : Hadien ka jingshah lehbeijot bad shah pyniap dusmon ka samla pule doktor Post Graduate 2nd Year ha RG Kar Medical College Kolkata ha ka 9 tarik mynta u bnai, ka NEIGRIHMS ka dei ka hospital kaba nyngkong eh ha kane ka jylla ka ban pynlong ïa ka jingthang mombati bad pynpaw ka jingsngewlem bad sngewpyrshah jur halor katei ka jingjia kaba la leh da ki riew thrangsnam.
Ha ka 14 tarik mynta u bnai ki dkhot ka Faculty, ki Doktor, ki MBBS, Nurse bad ki nongtrei ka NEIGRIHMS ki la ïalum lang bad pynlong ka jingïathang mombati ha NEIGRIHM kum ka dak ka jingsngewlem bad jingpynrem ïa katei ka kam runar ba la leh im im peit peit ïa katei ka samla pule doktor. Shwa ban sdang ka jingïathang mombati la ai jingkren da Dr Tanie Natung JOD Ophthalmalogy bad President jongka Faculty Association ha kaba ula ban jur ïa ka jingdonkam ban don noh da ka Central Healthcare Protection Bill. U Dr Suvamoy Chakraborty HOD ENT Departy u la pynrem jur ïa katei ka jingjia kaba la leh da ki runar thrangsnam bad dawa ba ki bor ka aiñ ki dei ban ai jingpynshitom da kaba tyngeh ïa kiba donkti. Dr Pritisha bad Dr Samapti ki la ai jingkren na ka bynta ki samla pule Postgraduate bad ki samla pule doktor. La kren pynkut da u Dr C Daniala Medical Superintendent jongka NEIGRIHMS ha kaba ul a ai khublei ïa baroh kiba la wan ban ïasnohkti lang bad ïashim bynta ha kane ka jingpynrem ïa katei ka jingjia ba sngewshyrkhei ïa katei ka samla pule Post Graduate ha RG Kar Medical College . La kyntu ruh ïa ki paidbah ban ïasnoh kti lang bad ki doktor kiba ïa kynduh ïa kiba bun ki jingeh khnang ba kan long ka jingai mynsiem ïaki ban nang ai ka jingshakri kaba paka ïa ki paidbah.