Nongpoh, Risaw 20 : Khlem da don shuh ka mynsiem sngewlem ki runar bym lah ban tip ki la leit ban thang ïa kawei ka Scooty Yamaha-Ray kaba don ïa u number ML 10 C 1229 tad haduh ba la ingkhong bad kylla dpei ha kawei ka jaka khlaw ha u pud u sam ka Shnong Saiden.
Kane ka Scooty ka dei kaba la long trai da u Bah Fleming Khymdeit na ka shnong Saiden, ha kaba uba la ai ban pyndonkam la 2 snem ei ei ïa u Bah Silvester Syiemlieh uba dei ruh u kynum trai jong u ha kaba u la pyndonkam ha kaba leit trei sha kper.
La ïoh lum jingtip ruh na ki Pulit, ba kane ka jingjia ka la jia mynta ka janmiet ha ka por 4 baje ei ei katba u Bah Silvester Syiemlieh u leit sha kper da katei ka Scooty ha kaba u la pynieng ha katei ka lynti khlaw, hynrei ka long kaba sngewsih hadien ba la wan phai la lap ba katei ka scooty ka la ingkhong bad kylla dpei ba la wan ban thang dusmon da ki runar.
Halor kane ka jingjia, une u rangbah u la pyntip mardor sha u trai Scooty bad la pyntip ruh sha ki Pulit ka Nongpoh kiba la wan ban tohkit halor kane ka jingshah thang ka Scooty bad kumba long haduh mynta ka jingtohkit ka dang iaid shaphrang.
