Nongpoh, Naitung, 08: Ar tylli ki kali Auto Rickshaw ki la shah thang ha ki runar bym lah ban ithuh durkhmat ha ka por shiteng synñia sngi Baar, kiba ki trai kali ki la set ha ka shnong Mawtnum laba hap ha Nongpoh Police Station.
Kane la jia ha ka por kumba 1:00 baje ne 2:00 baje mynstep ha kaba ki runar ki la thang dusmon ïa ki ar tylli ki kali haduh ban da ingkhong, kawei ka kali Auto Rickshaw ka la kylla dpei bad kawei pat ka la shu ingkhong malu mala.
Related Posts
Kine ki ar tylli ki kali Auto Rickshaw ba la shah thang dusmon ha ki runar ki long ka kali Auto Rickshaw kaba don ïa u number ML 10 D 0651 ba long trai da u Bah Roboatson Marweiñ bad kawei pat kaba la julor malu mala kaba don ïa u number ML10 D 3492 ka dei kaba la long trai da u Bah Xavier Thabah.
U Bah Robertson Marweiñ u la ong ba ka jingshah thang jong ka kali Auto Rickshaw jongu ka dei kam leh dusmon ki runar kiba ym don shuh ka mynsiem ïa tiplem namarba ka kali Auto Rickshaw ka dei kaba u ju kamai manla ka sngi ban pyndap ïa ka ïing ka sem bad kaba kham sngewsih ruh ka long ba ïa kane ka kali Auto Rickshaw u la shu theid da kaba shim ram kaba um pat lah satia ban siew pyndep.
U President ka kynhun ki nongñiah Auto ka Saiden Unit Bah Ricky Lyngdoh u la pynrem jur halor kane ka jingjia bad u la kyrpad ruh ïa ki bor ka aiñ ba kin tohkit bniah khnang ban lap ïa ki runar kiba leh ïa kane ka kam bymman.