Thang ki paidbah ïa ka tyngshop u Conrad Sangma ha Malangkona

Nongstoiñ, Jymmang, 03: Ka soskular pynbeit pud kaba la dep ïasoi hapdeng ka Meghalaya bad Assam, kam shym la pynkhih win tang ïa ki paidbah ka thaiñ Malangkona, hynrei ïa baroh ki nongshong shnong kiba don ha shilynter khappud bad ka jylla Assam bad ïa baroh ki sengbhalang hapoh ka jylla.
Ha kaba ïadei bad ka soskular jong ka jingpynbeit ïa u pud u sam ha ki lai tylli ki jaka kiba hap ha West Khasi Hills, ha kaba ki khawei tylli ki shnong kiba hap ha ka hima Nonglang Sirdarship kiba la shah khynñiat jubor sha Assam, ka la pynjaw ummat ïa ki hajar ki paidbah nongshnong shnong bad na ka bynta katei ka jingleh jong u Myntri Rangbah, ka la pynlong ïa ki nongïalam ka Hynñewtrep Youth Council ba kin hiar sha Malangkona ha ka sngi 30 tarik Ïaïong kaba dei ka sngi saitjaiñ, ban pynlong ïa ka jingïalang.
Ha ka jingialang ka ïa shim bynta lang da ki nongïalam jong ka Hynñiewtrep Achik National Movement West Khasi Hills, ki nongïalam ka Achik Holostic Awakenning Movement Aradonga Regional unit bad ki nongsynshar ka hima Nonglang Sirdarship, kiba la leit ban ai mynsiem bad pynshlur ïa ki ba kim dei ban khuslai ne sheptieng wat la ka sorkar ka ka rai ba kan ym phai dien shuh ne khyllie biang ïa ka soskular ba la dep ïasoi.
Ha katei ka jingïalang ba la pynïaid da u bah Roykupar Synrem Geberal Secretary ka HYC seng kmie, da ki spah ngut ki paitbah ki la ïapoi ban sngap ïa kaei kaba ki nongïalam jong kitei ki sengbhalang ki don ban ong na ka bynta jong ki. Ki nongkren ba kongsan ha katei ka jingïalang ki long u bah Lumlang Kharsyiemlieh President HYC West Khasi Hills, u bah Spren G Momin President ka AHAM Aradonga Regional Unit, bah Willstone Sohshang President ka HANM West Khasi Hills bad u bah Robertjune Kharjahrin President ka HYC sengkmie, u ba dei ruh ha kajuh ka por kum u Legal Adviser jong ka Khasi Hills Autonomous District Council.
U bah Robert Kharjahrin haba ai jingkren ha katei ka jingïalang, u la ther tyngeh ïa u Myntri Rangbah da kaba ong ba jingbym khot lang ïa ka District Council, ki nongsynshar hima bad ki nongsynshar shnong ban twad jingmut shwa ban ïasoi ïa ka soskular pynbeit pud, ka long ka jingibeiñ bad ka jingkheiñ poh ïa ki nongsynshar jong ka hima.
Ha ka juh ka por u la ong ba ha ka jingshisha u ne u snem 2022, u dei u snem ba ka jylla ka kynmaw burom ïa ki nongïaleh Hill State kum u (L) bah B.B.Lyngdoh, u (L) bah Hopingstone Lyngdoh bad kiwei kiwei. Hynrei, kane ka jingleh jong u Conrad Sangma, ka la long beit ka jingñiew beiñ ïa ka burom bad ka nam ka jong ki paidbah nongshong shnong.
U la ther tyngeh ruh da kaba ong, “Ko Conrad Sangma me dei u ei ba me nud ban I beiñ ïa ki nongïaleh hill state kiba la pynïoh ïa ka jylla da kaba shong phatok bad jaw snam ha ki jingïaleh ban pynïoh ïa ka jylla ba pura bad ban ïoh ïa ka hok long trai halor ka khyndew ka shyiap”.
Nalor kata u la ong ruh ba u Conrad u la soi ïa ka soskular da u khulom jong u bad lada um lah shuh ban pyndam, ka HYC ryngkat ki nongsynshar hima bad ki paidbah kin pyndam da u khulom jong ki ha Ïing Kashari. U la ong ruh ba lada ym lah da u khulom ka seng bad ki paitbah kin ym salia wat lada kan poi haduh ka jingïaumsnam ruh na ka bynta la ka jong ka hok.
Ha katei ka sngi shuwa ban pynkut ïa ka jingïalang kum ka dak jong ka jingpynrem ïa ka jingleh donbor jong u Conrad Sangma bad ka sorkar MDA, la thang ïa ka dur tyngshop jong u Conrad Sangma ha khmat ki paitbah ryngkat ka jingkynhoi bad pyrta ban pynrem ïa katei ka jingleh donbor jong u Myntri Rangbah bad ka sorkar jong u.