Thalaiñ ki nongïalam shnong ïa u YouTuber ba balaiñ stad khlem da tip ïa ka jingshisha

Nongpoh, Risaw 23: U Sordar Shnong ka shnong Nongwah Mawtamur bad ruh u nongaibuit ka Raid Warmawsaw-Umsohbar ha ka Hima Nongspung mynta ka sngi ki la mih shakhmat ban pynpaw ïa ka jingsngewkhia kaba jur, hadien ba la mih khubor ha ka Youtube Channel u Bah P.S Lyngdoh ha kaba ki jingkren ha katei ka channel ka dei kaba la shu batai stad ïa ki jaka ki puta bad ruh khlem da wad ïa ka jingshisha kumba la kam da u Estansing Jana Nongbet ha kaba u la kam ba dei u Sirdar ka Shnat Hima Nongwah Mawtamur ba hap ha ka Sohiong Lyngdohship.
Kumba la pynpaw sha ki lad pathai khubor mynta ka sngi, u Sordar Shnong ka Nongwah Mawtamur u Bah Prominson Nongrum bad u nongaibuit ka Raid Warmawsaw-Umsohbar jong ka Hima Nongspung u Bah Manoson Lyngdoh ki la kynthoh jur ba ka jingpynmih khubor u PS Lyngdoh ha ka Youtube Channel jong jong u, ka dei kaba la shu batai stad bad lamler suda khlem da wad ïa ka jingshisha bad tang ban pynbiej ïa ki paradoh ki para snam kiba dei ki khun Khasi Khara.
Ki la kynthoh ruh ba kane ka jingpynmih khubor ha katei ka Youtube Channel bad kumba la saphriang ka Audio ha ki rynsan Social Media ka dei kaba u Lyngdoh Sohiong u thmu ban die ïa ki jaka sha ki shipai BSF bad kaba lyngngngoh ka long ba u la kam ïa ki jaka naduh ka Umsylliang shaduh sha Umshru ba kine ki jaka kim dei shuh kiba hap tang ha ka Shnat Raid Hima Nongwah Mawtamur bad kane ka la ktah ruh sha ki jaka ki puta jong ka Hima Jirang bad ka Hima Nongspung.
Na ka liang u Sordar Shnong ka Nongwah Mawtamur, u la ong ruh haba u la pynbna paidbah kumba la mih ka khubor ha katei ka Youtube bad kaba sngewsih ka long ba ki paidbah nongshong shnong ka Nongwah Mawtamur kim don jingtip ei ei, ha kaba la shu kam jubor ïa ki jaka ki puta khlem da tip ïa ka jingshisha.
Ki la ong ruh ba u Bah Estansing Jana Nongbet, uba kam ïa lade kum u Sirdar jong ka Shnat Hima Nongwah Mawtamur ba hap ha ka Sohiong Lyngdohship, u la shu wan kam jubor ïa ki jaka ki puta da kaba kular ruh ban ai haduh shi akar ka jaka bad T. 5 hajar ka pisa lada don ki Khasi ba wan buhai shnong bad ka jingkylli ka mih hangne naei un ïoh ïa kata ka jaka, ha kaba ki jaka ki puta naduh na Nongwah Mawtamur shaduh sha Hima Jirang bad Hima Nongspung ki dei ki jaka ba la long trai da kiwei bad ba la don lut ki shnong ki thaw.
Halor kane ka jingpynmih khubor lamler bad ruh kumba la kam trai da utei u ba khot ïa lade ba u dei u Sirdar ka Shnat Raid Hima Nongwah Mawtamur, kine ki nongïalam ki la pynrem jur halor kane ka jingpynmih khubor lamler bad kane baroh ka dei tang ban pynbiej ïa ki paidbah kiba ym tip ïa ki jingshisha halor ki jinglong jingman jong ki jaka ki puta ba kum ki Nongshong shnong ki pyrshah jur bad lada u thmu ban ai jaka ruh kito kiba thmu ban wan buhai shnong kin nym ïoh jaka satia.
Shuh shuh, kum ki nongïalam ki la buh ïa ka jingkyrpad ïa ki paid Khasi Khara ba kim dei ban ngeit ïa kitei ki khubor ne ki jingkam lamler utei u briew ba kam ba u dei u Sirdar ka Shnat Hima Nongwah Mawtamur da kaba thmu ban jaka haduh 1 kar ryngkat ka pisa kaba T. 5 hajar, namar kine baroh ki dei tang ki kam pynbiej suda bad kin nym ïoh ruh ïa ki jaka ki puta ha kaba la long trai lut da ki riew shimet bad la don lut ki shnong ba pura ha kaba naei un ïoh ïa kata ka jaka, ki la pynshai shuh shuh.