Teipop ka CWC ïa ka KSU halor ka jingshah pynïap arngut ki bar jylla ha Ichamati

Shillong, Lber, 30: Ka Coordination and Welfare Committee (CWC) Shella Bholaganj Block kaba long ka kynhun ba la thaw da ki bar jylla ha ka sngi Thohdieng ki la ujor sha u Myntri Rangbah ka Jylla u Conrad Kongkal Sangma halor ka jingshah pynïap jong ki arngut ki bar jylla dang shen ha ka shnong Ichamati.
Ha ka ujor ba la soi da u President ka CWC, Shella Block, Gopal Dey u la dawa ïa ka Sorkar Jylla ban kem mardor ïa ki briew kiba donkti ban pynïap ïa u Ishan Singh bad ïa u Sujit Dutta ha Ichamati ha ka 27 tarik mynta u bnai bad dawa ruh ban aiti ïa ka jingtohkit sha ka CBI/NIA, ban siew bailutksasn sha ki bahaing hasem jong kine ki arngut kiba la shah pynïap bad ban pynthikna ïa ka jingshngaiñ jong ki bar jylla Hindi kiba buhai shnong ha Ichamati bad ha ki shnong bamarjan.
Ka CWC ka la phah ruh ïa kane kajuh ka jingujor sha u Myntri Rangbahduh ka ri Narendra Modi bad sha u Myntri ka tnat Kam Pohing Amit Shah bad sha u Lat ka Meghalaya u Phagu Chauhan.
Lyngba kane ka ujor, ka CWC, Shella Block ka la teipop ba dei ki dkhot runar jong ka Khasi Students Union (KSU) kiba la pynïap ïa u Ishan Singh bad ïa u Sujit Dutta.
Haba buh jingkylli ïa ki bor synshar, ka CWC ka la ong, “ka Ichamati, ka dei ka shnong kaba hap hapoh ka East khasi Hills District jong ka jylla Meghalaya kaba la pyllait na ki kyndon jong ka CAA namarba ka hap hapoh ka Sixth Scheduled, ka dei ruh ka jaka kaba ka Khasi Students Union ka la pynlong ïa ka jingpyrshah ïa ka CAA kaba lam sha ka jingshah pynïap jong u Ishan Singh bad u Sujit Dutta. Ha kaba ïadei bad kane, ka jinglong jingman kaba ngi mad ïa ka jingim kaba syier bad ka jingartatien, ngi kwah ban buh jingkylli, kumno la ailad ban pynlong ïa ka rally ha Ichamati? haba ka (Model) Code of conduct ka la treikam?”
Ka CWC ka la buh jingkylli da kaba ong, “shano ki Pulit ki don haba ki dkhot jong ka KSU ki wan da ki kali ha Ichamati bad thombor ïa ki bar jylla kaba wanrah ïa ka jingkulmar bad ka jingsahh pynïap uwei u Bengali bad uwei u Adivashi kiba dei ki nongbylla kit maw.”
“Hato ka Sorkar Jylla ka dei tang ka Sorkar tang jong kawei ka jaidbynriew? Hato ki bym dei ki riewlum kim dei ki nongthep vote/ki nongshong shnong ka Meghalaya? Hato ka Sorkar kam lah ban leh eiei pyrshah ïa ki kynhun shitkhlieh ka Jylla Meghalaya.? Sa katno ngut ki ban duhei ïa ka jingim ba ka Sorkar Jylla bad ka Sorkar Pdeng kin ïohsngew ïa ka jingud jingïam jong ki bymdei riewlum ha Meghalaya? la buh jingkylli shuh shuh ka CWC.
“Hato u kpa uba duhei ïa la u jong u khun tang na ka daw ki runar ka KSU un ïoh ïa ka hok? la kylli shuh shuh ka CWC.
Ka CWC ka la kam ba ka jingjia ka la jia hadien ba ka rally pyrshah ïa ka Citizenship Amendment Act ba la pynlong da ka Khasi Students’ Union (KSU) bad kiwei kiwei ki sengbhalang ha Ichamati, katkum ki khubor jong ki lad pathai khubor.
“Ka jingïaumsnam ha ka jingïakhih pyrshah ïa ka CAA kaba ladep ka la jia ha ka shnong Ichamati kaba poi haduh u pud ba ki bar jylla kiba sah ha kane ka thaiñ kim lah mutdur. Wat hadien ba la sakhi kum kine ki jingjia ha u snem 2020 ha ka jingïaumsnam ha Ichamati, balei ki bor synshar district ki dang ai jingbit ïa ki kynhun ban pynlong ïa ka rally ha kajuh ka jaka?” la kynthoh ka CWC lyngba u Gopal Dey.
“Nga phah ïa kane ka jingthoh sha phi ban dawa ïa ka hok jong ki arngut kiba la khladnoh bad ki bahaing hasem jong ki bad baroh ki khun shynrang bad kynthei ka Meghalaya kiba shah ibeiñ ha kawei ka liang tang namarba kim dei na kajuh ka jaidbynriew heh paid. Nga phah ïa kane ka jingthoh ban pynpaw ïa ka jingsngewkhia jong nga halor ka jingjia ba dang shen jong ki briew ki bym dei ki riewlum ha Meghalaya. Ki aiñ bad ki kyndon ka jylla kiba la thmu ban ïada ïa ki trai jylla, hynrei ki la long pynban ki mawsiang ba ïatakhuh ïa ki nongshong shnong bar jylla. Bun tylli ki jingshah typyrkhing, bun tylli ki Rul, bun tylli ki aiñ (kiba treikam tang ïa ki bar jylla ka Meghalaya) ki la buh jingeh ïa ki bym dei ki trai jylla ban shong ban sah bad ban kamai kajih ha ka jylla, shah khanglad ha ka ïoh ka kot, ka kamai kajih, ka jinglaitluid, bad wat ha ka jingim,” la kynnoh u Gopal Dey.
“Sa kawei ka jingeh ba la mad da ki bym dei ki trai jylla ka dei ka jingbym don ïa u nongmihkhmat. Ka saiñpyrthei kaba dei beit thik tang ïa ki trai jylla ha Meghalaya bunsien ka la khñoit ïa ka sur jong ki bym dei ki trai jylla, ka la buh jingeh ïa ki ban kren haba wanrah ïa kino kino kino ki rai kiba ktah ïa ka jingim jong ki,” kynnoh shuh shuh u Dey.
“Shuh shuh, ki bar jylla kiba sah ha Meghalaya, bunsien ki mad ïa ka jingshah ibeiñ bad shah kiar, kaba ktah pat ïa ka jingim kaba marïaryngkat watla ki shong ki sah hapoh ka jylla. Kane ka jingshah ibeiñ ka lah ban ktah ha kiba bun rukom, kynthup ïa ki ing ban shong ban sah, ka pule puthi, ki lad ïohkam ïohjam bad kaba kham shyrkhei ka dei ka jingduh ei ki nongkynti bad ka jingim. Ka long kaba donkam ban ithuh ïa baroh ki nongshong shnong ka Meghalaya, khlem da kheiñ kyrdan riewlum, dei ban niew lang bad ban ai ïa ka hok ba mar ïa ryngkat,” ong shuh shuh u Dey.”
“Namarkata, nga kyntu ïa ki bor ba dei peit ba kin pdiang ïa ki jingai jingmut khnang ban kan pynjanai ïa ka im, ka shong ka sah jong ki bym dei ki riewlum ha Meghalaya da kaba kem mardor ïa ki runar kiba donkti ban pynïap ïa ki bar jylla khnang ba ka shongsuk shongsaiñ kan don hapoh ka Jylla. Lada ki bor pulit kim lah ban kem ïa ki nongleh kam bymman hapoh shitaiew, ïa ka jingtohkit dei ban aiti noh sha ka CBI/NIA,” la dawa ka CWC.
“Dei ban pynthikna ba ki bym dei ki riewlum ki dei ban ïoh jingïada na ki kam bymman bad ban ïada na ki jingshah pynmynsaw bad na ki kam runar da ki kynhun shitkhlieh ka Meghalaya pyrshah ïa ki ritpaid (bar jylla) jong ka jylla Meghalaya. Ban buh ïa ka Permanent Security Outpost/ CRPF/ ne kino kino ki Para-military Camp ne Post ha ki jaka kum ha Bholaganj bad Ichamati,” dawa ka CWC.
Ka CWC ka la kynnoh ba bun na ki sengbhalang naduh ba la pynkha ki dei kiba donkti ban pynphriang ïa ka jingisih pyrshah ïa ki bar jylla ritpaid ha Meghalaya bad niew ruh ïa ki bym dei ki riewlum kum ki “Bar Jylla”. Ha kawei pat ka liang ne ka jingbym leh eiei jong ka Sorkar Jylla ka pynlong ïa ki runar jong kynhun sengbhalang ban ngeit ba ki dei kiba kham halor jong ka aiñ. Namarkata, dei ban thaw ïa ka aiñ kaba pyrkhing khnang ba ka Sorkar kam lah ban shu bret ïa ka jingkitkhlieh bad ïa ki nongleh kam bymman dei ban kem bad ym ba kin shu ïai sah ha ki kot tang kum ki “runar bym ithuh durkhmat.”
Ka CWC ka la dawa ïa ka Sorkar Jylla ban tem ïa ka jingibeiñ bad ban wanrah ïa ka jingïalong kawei hapoh ka jylla khnang ba ki trai jylla bad ki bar jylla kin im suk im saiñ hapoh ka jylla bad ha kajuh ka por kane ka kynhun ka la dawa ban ai jingkyrshan bad ai jingïarap sha ki jaidbynriew bar jylla khnang ban kyntiew ïa ka bha ka miat ka jong ki hapoh ka Jylla Meghalaya.