Teipop ka Congress ïa ka Sorkar MDA, kynnoh ba shah khyrwait shabi ha ka BJP

Shillong, K’lyngkot, 23: Ka Meghalaya Pradesh Congress Committee (MPCC) ka la teipop ïa ka Sorkar MDA ba ïalam da ka National Peoples Party (NPP) halor ka jingbym ai jingbit ïa u Rahul Gandhi ban ai jingkren sha ki samla pule ha University of Science and Technology (USTM), Meghalaya ha ka sngi Baar.
Ha ka jingïakren bad ki lad pathai khubor hadien ba la wan phai na Ribhoi District, u President ka Meghalaya Pradesh Congress Committee (MPCC) Bah Vincent H. Pala u la kynnoh ruh ba ka Sorkar MDA ba ïalam da ka NPP ka la shah khyrwait shabi ha ka Sorkar BJP na Delhi bad ha ka Sorkar BJP na Assam.
Ha ka jubab ba la phah da u Deputy Commissioner ka Ribhoi District sha u President ka Ribhoi District Congress Committee Bah Charles Marngar u la pynpaw ba ïa ka No Objection Certificate (NoC) na u Vice Chancellor ka USTM bad na u Rangbah Shnong ym shym la pyndait satia ha ka aplikeshon pan jingbit. U DC u la ong ruh ba la aipor ïa ki nongpynlong jingïalang ban phah ïa kine ki kot ba donkam ïa kaba kim shym la phah satia. Namarkata ka aplikeshon kam long kaba pura.
“Ngi la buh ban pynlong ïa ka jingïalang ha USTM namarba ka Hall ka dei kaba heh kaba ngiam palat lai hajar ngut ki briew hynrei kaba sngewsih ka long ba ka Sorkar ba la ïalam da ka NPP, UDP bad ka BJP ki la kyntait ban ai jingbit. Kam pat dei ka jingïalap elekshon bad ka Model Code of Conduct kam pat treikam satia ha ka ri baroh kawei namar bym pat pynbna ïa ka tarik ban pynlong ïa ka elekeshon. Ka jingbit ka long tang ka bynta ka Security bad ka NoC na ka University. Kaba sngewsih, ka pynpaw ba ïa ka Sorkar Meghalaya hukum da ka Sorkar BJP na Delhi bad na u nongïalam ka North East,” la kynnoh u Bah Pala.
“Ki paidbah ki dei ban buh jingmut, ha ka elekshon ka ban sa long ïa ka vote kaba ki ai sha kino kino ki seng saiñpyrthei ki bym dei na ka Congress ka mut hi ba ki ai vote ïa ka BJP. Kane ka pynpaw shynna hynnin ka sngi ba ki tieng thot thot ïa ka Congress bad khlem kano kano ka daw ki kyntait ban ai ïa ka jingpan jingbit,” la kynnoh shuh shuh u Bah Pala.
U la ong shuh shuh ba ka jingkwah jong u Rahul Gandhi ban ai jingkren ha USTM kam long na ka bynta ka jingai jingkren ha ka saiñpyrthei na ka bynta ka jingïakren bad ki samla kumno ban ai jingkyrmen ïa ki samla.
“Ka Bharat Jodo Yatra ka long ban pynïoh ïa ka hok sha ki samla. Ka jingïashim bynta jong ki samla bad ki paidbah, ka jingïakren bad ki kynthei, ka jingïakren bad ki nongrep, ka jingïakren bad ki nongbylla. Kane ka long shi bynta jong ka prokram. Watla ki (bor synshar District) pynsangeh ïa ngi ha USTM hynrei ngi la ïoh ban pynlong ïa ka jingïalang ha Hotel bad ki samla pule. Ha ka por 8 baje mynmiet ki samla pule ki wan sha Hotel bad u Rahul Gandhi u la ïohlad ban ïakren bad ki. Ngi la don ruh ïa ka jingïalang jong ka North East Congress Co-ordination Committee (NECC) mynta ka sngi. Kane ka pynpaw shynna ba ïa ka Sorkar jong ngi la kyrwait shabi da ka BJP namarba ka pyrshah ïa ka Yatra ong u Rahul Gandhi. Ka BJP kam kwah ba u Rahul Gandhi un don ka jingïadei bad ki paidbah. Ka jingmut jong ka Yatra ka long ban pynïajan bad ki paidbah, ban shah skhor ïa ki (jingeh) paidbah bad ban sngap ruh ïa ka jingpynsngew jong ki paidbah. Da kata ka lynti, ngin sa lah ban sngewthuh ïa ka jingkwah jong ki paidbah bad ynda la thaw ïa ka Sorkar ngin sa lah ban pynurlong. Ynda ngi la shna ïa ka Manifesto ngin dup lah ban pynrung ïa ka jingkular,” u la bynrap.
Haba kynthah shuh shuh ïa ka Sorkar MDA, u Bah Pala u la ong, “ki paidbah ka Meghalaya ki dei ban pyrkhat bha bad ki dei ban tip ba kane ka Sorkar ka dei kaba shah khyrwait shabi ha ka BJP na Delhi bad na Assam. Ïa kane ngi sngewthuh na ka jingïakren bad u Director ka USTM uba la shah byrngem. Kane ka dei ka jingshah tynjuh kaba ngi mad ha North East. Ka jingbyrngem ka long ruh wat ïa ki shlem pule bad ïa ki paidbah, bad ïa ki nongkhaii.”
“Ka NPP bad ka BJP ki long kajuh. Ngi pynrem jur balei ym shym ai jingbit ïa ngi hynrei balei pat la ai jingbit ïa kiwei ki party,” u la ong.