Tei noh da ka veterinary hospital ha jaka ban ai ïa ki shipai suiñ : kyntu u Myntri ïa u CM

Shillong, Jymmang 25 : U Myntri ka tnad C&RD ba dei ruh u MLA ka Mylliem, Bah Hamlet Dohling u la kyrpad ïa u Myntri Rangbah ka jylla, Conrad K Sangma ban tei noh da ka veterinary hospital ha ka jaka ba ka sorkar barim ka thmu ban ai sha ki shipai suiñ kaba don ha Upper Shillong.
Ïa kane, u Bah Hamlet u la pynpaw haba kren kum u Symbud Kongsan ha ka jingïalang jong ka tnad AH & Veterinary kaba long ha Upper Shillong ha kaba u Myntri Rangbah ka jylla u la donlang kum u Kongsan.
“Nga la pyrshah jur ïa kane ka jingthmu ryngkat bad ki nongshong shnong ka thaiñ kumjuh ki Rangbah Shnong naduh shwa ba ngan long kum u MLA. Nga don ruh ka jingkyrpad ïa u Myntri Rangbah ka jylla ba un shimkhia ïa katei ka bynta bad ba un ym ailad shuh nangne shakhmat,” la bynrap shuh shuh u Bah Hamlet.
Da kaba banjur ba donkam pynban ban tei da ka veterinary hospital ha katei ka jaka kaban pynmyntoi lang ïa ki paidbah nongshong ka thaiñ, u Bah Hamlet u la pyntip ruh ba ïa kane ka sienjam u la dep ruh ban pynsngew ha ka tnad ba dei peit.
Ha katei ka sngi, u Myntri Rangbah ryngkat u Bah Hamlet ki la leit ban plie ïa ka projek jong ka tnad ha Indo Danish Project (IDP), Upper Shillong.