Nongstoiñ, Nailur, 21: Kum ka dak ban pynsah nam ïa u (L) Bah Hopingstone Lyngdoh u ba dei u nongseng jong ka Hill State People Party, mynta u snem ka party ka la shim ïa ka sien jam kaba khraw na ka bynta ban pynsah ïa ka nam bad ka kyrteng jong u ha kaba ka la sdang ban tei ïa u mot sah jingkynmaw ha kliar jong uwei u lum uba itynnad bha ha Mawphanlur bad ha utei u mot ha jrong jong uwei u lum ha ka shnong Mawphanlur.
U President rangbah ka HSPDP u Bah K.P.Pangñiang u la ïathuh ba ha utei u mot, yn thoh ruh ïa ki kyrteng jong baroh ki volounteer kiba la ïa shim bynta ha ka jingïakhih ban dawa ïa ka jylla ba pura. U bah Bony Lyngdoh President ka HSPDP Youth wing Rambrai constituency, u la ong ba ha u bnai Kyllalyngkot jong une u snem, ki nongïalam jong ka HYC Mawthadraishan circle, ki la leit sha Mawphanlur ban ïakynduh ïa ki trai khyndew kiba la pynkhreh ban aiti ïa ki kot ki sla, na ka bynta ba kin pyndonkam ha kaba tei ïa utei u mot bad ki trai jaka ruh ki la aiti ha ki ïa ki dulir. Hynrei kham hadien katto katne bnai kim shym la treh shuh ban shna bad ki la pynphai noh ïa baroh ki dulir kiba la ai da ki trai jaka.
U President ka HSPDP Youth Wing Rambrai Jyrngam Constituency u Bah Bony Lyngdoh Lyngkhoi u la ong ruh ba katei ka jaka ka dei ka jong ki khun jong u bah Drin Kharbani bad ka Kong Rina Lyngdoh Lyngkhoi, kiba dei ki trai khyndew jong ka shnong Mawphanlur kaba hap ha ka hima Myrïaw. U la ong ruh ba ïa katei ka jaka la ai sngewbha da ki khun jong ka kong Rina da ka mynsiem kaba kylluid ki la ai sngewbha khlem da siew dor ei ei wat tang shi tyngka ruh.
Katei ka jaka kaba ki la ai sngewbha ka don ha kliar jong u lum uba don shaphang shatei na ki pung bad ki jaka sah kiba la shna na ka bynta ki nong wan jngohkai. Nalor kata u la ong ruh ba mynta ka jingpyntrei ïa utei u mot ka la ïaid shait shait bad la jan dep artad, namar ka jingthmu ka long ban pyndep ha ka por kaba biang bad ba yn plie ha ka lyngkhuh snem kaba hynñiew jong ka jingkhlad noh jong u (L) Maieit Hopingstne Lyngdoh kaba dei ha ka 26 tarik u bnai Nailur mynta u snem.
U Bah Bony uba dei u khun rangbah jong ka kong Rina u la ong ba ka jingai sngewbha ka long namar ba ki don ka jingsngewieit bad sngew jan haduh katta katta ïa u (L) bah Hopingstone Lyngdoh, namar u dei na katei ka thaiñ nalor kata ka jingïoh ïa ka jylla ba pura ka dei lyngba ka jingïohi jngai jong u kum u nongïalam.
