Nongpoh, K’lyngkot, 19: Ban pynsngewthuh paidbah halor ka jingma na ka jingpynkheiñ ïa ki kyndon aiñ ñiah kali ba bunsien ki wanrah ki jingjia kiba sngewsih, ka Ri Bhoi Traffic Police (RBTP) ryngkat ka tnad Traffic Police na Nongpoh Police Station ha ka Sngi U Blei ki la pyni syndon da ki kam ba ki paidbah ki hap ban bud ïa ki kyndon aiñ ñiah kali.
Ka jingpynsgewthuh jong ka Ri Bhoi Traffic Police sha ki paidbah ka dei kaba ki la pynlong ïa ka jingkhynra ïa ki kali kiba pynkheiñ aiñ bad ha kajuh ka por ki la sam da ki helmet sha ki khynnah, ki rangbah, ki riew kynthei kiba ñiah ïa ki kali ar shaka.
Ki Traffic Police ka Ri Bhoi ki la bteng ïa ka jingtalasi ïa ki kot ki sla bad ban bat ïa ki kali ba pynkheiñ aiñ la bun sngi mynta bad ki Traffic Police ha ka sngi U Blei ki la bat ruh ïa ki kali ar shaka ryngkat ka jingbthah ba ki dei ban don ki helmet bad ïa ki nongñiah kali la bthah ba kin deng ïa ki seat belt na ka bynta ka jingshngaiñ ha ka leit ka wan.
U Superintendent of Police ka Ri Bhoi Vivekanand Singh Rathore u la ong ba kane ka jingtalasi ïa ki kali ar shaka bad kiwei ki kali ka long shi bynta ban hikai bad ban pynsngewthuh ïa ki paidbah ba ki hap ban bud ïa ki kyndon aiñ ñiah kali namarba bunsien tang na ka daw ka jingkheiñ sting ki wanrah pan ïa ki jingjia ba sngewsih ïa ki nongñiah ne ki nongshong kali.
U la ong, ba kane ka dei ruh shi bynta ka jingtehlakam ïa kino kino kali kiba pynkheiñ aiñ bad ruh ka jingpeitngor na ka bynta ka jingrakhe ïa ka Republic Day ka ban long ha ka 26 tarik mynta u bnai.
U la la ong ruh ba ka jingsam ïa ki Helmet ka long ban pynsngewthuh ïa ki paidbah khamtam kito kiba pyndonkam ïa ki ar shaka ym dei ban kup helmet tang ïa u nongñiah bad kiba shong lang nadien ruh ki dei ban kup helmet na ka bynta ban shngaiñ ha ka leit ka wan bad ruh ban ym mih kino kino ki jingjia ba sngewsih kiba dei tang na ka daw ka jingpynkheiñ aiñ.
