Tehlakam ïa ki kam beaiñ ha Goralane shwa ban kynriah ïa ki Kharmetor: Wankitbok Pohshna

Shillong, Nailur, 04: Ka jingthmu jong ka Sorkar MDA ba lamkhmat da ka NPP ban pynkynriah ïa ki 342 tylli ki longing ka la pynkyndit ïa ki nong Laitumkhrah namarba ka jaka Quarter jong ka Shillong Municipal Board (SMB) ka don ha syndah ka dong Boyce Road bad ki jaka pule ba paw jong ka jylla.
Watla ka jingmut ban pynieng da kita ki jingtei ba kot hynniew mala ban pynsah ïa kiba trei ha Municipal na ‘Them Iew Mawlong ka long kaba sngewtynnad ban mutdur hynrei ki paidbah ka thaiñ ki sheptieng ïoh ka kylla pynban kum ka Gora Lane baar ha kaba ki kam beaiñ ki long ba shyrkhei, ong u Bah Wankitbok Pohshna ha u kyrwoh ba la phah sha ki lad pathai khubor.
“Hadien ki jingujor ba bunsien kam shym la don ka jingshimkhia eiei na ka liang ki bor Sorkar ban pynbeit ïa ki kam beaiñ ha Gora Lane ka ban pynhun ïa ki nong Laitumkhrah hynrei ka jingthmu jong ka Sorkar ban pynbeit ïa ki kynrum kynram da kaba wanrah sa kawei ka Them Metor shajan ka shnong Laitumkhrah kam long kaba lah ban pdiang daleilei,” u la ong.
“Hato ka Sorkar ka lah mo ban kular ba katei ka jaka ba thmu ban wanrah ïa kitei ki longing kan nym kylla long ka Gora Lane baar. Kum ka dak ban ïoh jingshaniah jong ki paidbah la khmihlynti nyngkong ba ki bor synshar district kin tehlakam shwa ïa ki kam be-aiñ kiba ïaibteng hapoh ka phyllaw jong ka Municipal ha Gora Lane shwa ban wanrah sa kawei ka jaka buhai shnong shajan Laitumkhrah,” u la ong.