Tehlakam ïa ka shongsuk shongsaiñ ba dang don eksam ki khynnah skul : SNS Nongthymmai Pyllun

Shillong, Naiwieing 23 : Ka Synjuk ki Nongsynshar Shnong Nongthymmai Pyllun ha ka sngi Balang ka la kyntu ïa ki kynhun bapher bapher ba kin snohkti lang na ka bynta ban pynneh ïa ka suk ka saiñ ha ka jylla baroh kawei khamtam mynta ba ki khynnah skul kiba bun ki dang don ha ka eksam kut snem.
“Ngi kum ki Nongsynshar Shnong ngi don kajuh ka jingsngewkhia bad pynrem jur halor katei ka jingshah siat iap jong ki san ngut ha Mukroh hynrei ka Synjuk pat ngi kyrpad ïa kiwei pat ki nongïalam shnong bad ruh ia ki seng bapher bapher ba kin ai ka jingiatrei lang na ka bynta ban tehlakam ia ka suk ka saiñ bad ia kino kino ki jingkulmar kiba lah ban ktah ia ka imlang sahlang khamtam ha ka nongbah,” ong u Chairman ka Synjuk, Bah Bantyllilang Nari haba kren bad ki lad pathai khubor ha Shillong Press Club.
Katei ka jingkyrpad jong ki kadei halor ka nongrim ba ki khynnah skul bad ki samla pule kin ym shah pyndik ha kane ka eksam kut snem bad kiwei kiwei ki eksam kiba dang ïaid mynta.
“Bun kiba la artatien bad synjor ba ïoh ka thut ka eksam ïa ki khun ki pyrsa,” u la ong da kaba kyrpad ïa baroh ba kin ïa snohkti lang ban pynneh ïa ka suk ka saiñ.
Shwa kane, u la ïathuh ruh ba kum ka Synjuk ki sngewkhia haduh katta katta halor katei ka jingjia bad ki la dep ruh ban pynlong da ka jingïalang hadien ba u Myntri Rangbah u la dep ban khot da ka jingïalang bad ki Khlieh Nongsynshar hynin ka snngi. “Ka Synjuk ha ka jingïalang ka la pynrem ruh ïa ka jingleh riewkhlaw da ki riew bat aiñ da kaba pyndonkam bakla ïa ka bor jong ki,” u la bynrap biang.
Ka Synjuk ka kyntu ruh ïa ki nongsynshar ka Meghalaya hapoh ka jingïalam jong u Conrad Sangma kumjuh ïa u Myntri Rangbah ka Assam ba kin buh ïa ka kynhun tohkit ne ka jingwad bniah kaba tikna bad ka bym ïa shah liang ban lap ïa ka jingshisha la ka dei ban khot da ki Agency la ka long naduh ka NIA, CBI lane kino kino ki bor tohkit ban lap ïa ka daw tynrai haduh ban da duh noh ki mynsiem briew.