Tar naphang ki Pulit Ri-Bhoi ïa ki kali tah ïit iong, kiba pyndait LED light

Nongpoh, Nailur 11: Ki Pulit ka Ri-Bhoi mynta ka sngi ki la talasi naphang ïa ki kali kiba ïaid ha surok bah National Highway haka thaiñ Mawdiangum hadien ba ki pulit ki la dep maham ïa ki paidbah ba kim dei ban pyndait ïa ki iit iong, ki LED Light bad ki siren khlem ka jingbit.
Ha kane ka jingtalasi ki pulit ki la lap ïa shibun ki kali naduh ki 2 shaka, ki 3 shaka bad ki 4 shaka kiba pynkheiñ aiñ, tah iit iong, kiba pyndait ruh da ki light LED kiba thaba bad ktah bad pynthud ïa kiwei pat ki paidbah bad kumjuh ruh ki bym don ïa ki kot ki sla kiba biang naduh ki License ñiah kali bad ki kot ki sla kali.
Na ka liang ki pulit ki la tar naphang ïa kitei ki kali kiba tah iit iong, bad phah weng mardor ïa ki kali kiba pyndait ïa ki LED light kiba thaba ryngkat ka jingmaham ïa baroh ba kim bit ban pynkheiñ ïa ki kyndon aiñ ñiah kali.
Haba kren sha ki lad pathai khubor na ka liang u Orville Massar Additional Superintendent of Police ka Ri Bhoi District u ba la lamkhmat ïa kane ka jingtalasi u la ong ba ïa kane la leh katkum ka jingbthah na u heh pulit ka Ri-Bhoi ban talasi ïa ki kali pynkheiñ aiñ bad kumjuh ruh ban pynshisha ïa ki kot ki sla bad ki license jong ki nongñiah kali.
“Watla la ju pyrshang ban pynsngewthuh paidbah, hynrei la lap ba bun ki nongñiah kali kim don laisen niah kali, ka jingthmu jong ngi kam dei ban pyndik ïano ïano hynrei ban pynthikna ba uwei pa uwei u nongñiah kali un ñiah da ka jingkitkhlieh, ban bud ïa ki kyndon pynïaid kali, bad ban pynneh ïa ki kot ki sla jong ki kali,” ong u Massar.
U la kdew shuh shuh ba kane ka dei shi bynta jong ka jingpyrshang ban pynsngewthuh shaphang ka jingshngaiñ ha surok bad kum ki bor pulit kin bteng ïa ka jingtalasi ym tang ha Nongpoh hynrei ha kiwei kiwei ki bynta ka dong Ri-Bhoi bad tang mynta ka sngi ki pulit ki la ïoh ban daiñ kuna haduh 1 lakh na ki paidbah kiba pynkheiñ aiñ haba ñiah kali ha surok bah.