Imphal, Jylliew 30 : : U N Biren Singh hynne ka sngi Thohdieng, ula pynshai ba un nym ïehnoh satia ïa ka kam kum u Myntri Rangbah ka Jylla Manipur hadien ka jingleit tur paidbah bad tawiar ki Longkmie ia ka ïingsah jong u, kiba pynpaw ba ki dang kwah ba un dang bteng ïa ka jingsynshar ha Jylla.
U Biren Singh ula pynshai ba un nym pat ïeh satia ïa ka shuki kum u Myntri Rangbah.“Ngan nym pat ïehnoh ïa ka kam kum u Myntri Rangbah” ong u N Biren Singh Myntri Rangbah ka Manipur ha ka Twitter. Kane ka jingpynthikna ka la mih hadien katto katne kynta ba la saphriang ki dur jong ka shithi ïehnohkam u N Biren Singh, kaba la tar lyngkhot lyngkhai.
Ka khubor ba ïoh ka ïathuh ba ïa kane ka shithi ïehnohkam u Biren Singh la tar da kine ki Kynthei kiba pyrshah ïa u ba un hiar shuki.
Lah ïathuh ruh ba u Biren Singh u khlem ïoh satia ia ka jingbthah jong ki Nongïalam na Delhi ba un hiar shuki hynrei kane ka rai ka la mih hadien ba u Myntri Rangbah ula sngewsih halor ka jingïakhih jong ki Kynthei kaba jia ha ka 29 tarik Jylliew ha Imphal.
Lah ban kdew ba u Biren Singh ula shah kynthoh jur bha halor ka jingbym lah ban tehlakam ia ka jingshongsuk shongsaiñ ha Manipur hadien ba khie ka thma ïapher jaidbynriew hapdeng ki Meitei bad ki Kuki, kaba la sdang naduh ka 3 tarik u Jymmang.
Da ki spah ngut ki Longkmie ki la ker sawdong bad pakhang lynti hajan ka ïingsah u Biren Singh hynne ka step mar syn ïoh jingtip ba u don jingthmu ban hiar shuki noh. Kine ki Longkmie ki la pynpaw ba ki dang shaniah ha u (Biren) ban long kum u Nongïalam ka Jylla bad dei kane ka la pynkylla ïa ka rai jong u Biren Singh.
U Biren Singh ula mih nala ïing da ka jingthmu ban leit sha ka ïingsah ka Lat hynrei namar ka jingpakhang lynti ki Longkmie bad jingshah tar ka shithi ïehnohkam, ula leit phai biang shala ïing.
Kat kum ka khubor ba dang shu ïoh, ki Dkhot jong ka BJP ha Manipur ki la ïa ïehnohkam paidbah na ka Party bad ki la pynsdang ïa ka jingïakhih “War on BJP Non Violent Campaign” namar ka jingsngew ba ka BJP kala shet kylla ïa ki nong Manipur.
