Tangba la long Khristan kam mut ba ngim lah shuh ban leit sha ki tamasa pynneh riti: Sanbor Shullai

Shillong, Risaw, 24: U Myntri ka tnat Arts and Culture ka Sorkar Jylla u Bah Sanbor Shullai u la banjur ba ka jingpdiang ïa ka jingngeit Khristan kam mut ba ym lah shuh ban leit ïashim bynta ha ki tamasa pynneh riti ka jaidbynriew.
U la pynpaw ïa kane hadien ka jingleit ïashim bynta ha ka Meghalaya Tribal Indigenous Choir Festival ba la pynlong da ka Young Men Christian Association (YMCA) da ka jingïatreilang bad ka Shillong Public School bad ba la ai jingkyrshan da ka tnat Arts & Culture ha ka sngi Thohdieng.
U Bah Shullai u la kdew ruh ba ha kiba bun ki jylla ka thaiñ Shatei Lammihngi, ba kynthup ïa ka Nagaland, Mizoram bad Meghalaya, ki Khristan bad ki bym pat long Khristan ki ju ïashim bynta ban pynneh pynsah bad ban pynriewspah ïa la ka jong ka kolshor ban pynneh ïa la ka jong ka riti ka dustur.
U la ai nuksa kum ka Hornbill Festival ha Nagaland, ka Wangala Dance ha Garo Hills bad ka Shad Nongkrem bad ka lehniam Behdeinkhlam ha Meghalaya, ha kaba ki paidbah na ki jingngeit bapher bapher ki ju ïashim bynta lang.
“Ka long kaba bakla ban ong ba kito kiba la pdiang ïa ka jingngeit Khristan kim lah shuh ban ïashim bynta ha ka rong ka taw ba pynneh ïa ka riti ka dustur lajong,” la ong u Bah Shullai.
“Ngi ïohi ha Nagaland, 98 percent ki dei kiba la long Khristan, hynrei ki dang pynneh pynsah ïa ka Hornbill Festival. Ha Mizoram, 97-98 percent ki dei ki Khristan hynrei ki dang pynneh ïa la ka jong ka lariti. Wat ha Garo Hills, 95 percent ki dei ki Khristan, hynrei ki dang pynneh pynsah ïa ka jingshad Wangala Dance, kaba pyni ïa ka jingïashim bynta da baroh,” u la ong bad bynrap, “wat ha ka lehniam Behdeinkhlam da ki hajar ngut ki Khristan ki ïashim bynta lang, ki shad ha ka pung Aitnar ha Jowai. Kumta, ka long kaba bakla ban ong ba kito kiba la kylla sha ka niam Khristan kim lah shuh ban ïashim bynta lang ha ka jingpynneh pynsah ïa la ka jong ka lariti.”
U Myntri u la pynpaw ïa ka jingsngewhun halor ka jingpynlong ïa ka tamasa kaba la ïashim bynta na ki 12-13 tylli ki sklu bad na ka skulbah NEHU, kaba thmu ban kyntiew bad ban pynneh pynsah ïa ka jingriewspah ka kolshor ki jaidbynriew riewlum bad ki jingrwai tynrai jong ka jylla Meghalaya.
U la pynbna ba ka tnat ka la thmu ruh ban khot kham bun ki skul bad ki kolej ban ïashim bynta lang ha ka tamasa rwai ha u snem ban sa wan.
U Bah Shullai u la pynbna ruh ïa ka jingthmu ban pynlong ïa kawei ka prokram pynneh kolshor ha ka 15 tarik Naiwieng, ha kaba yn sa ïashim bynta lang da ki kynhun tem bad rwai tynrai na kylleng ka ri India.
U la banjur ruh ba ka jingthmu jong ka tnat ka long ban kyntiew bad ban pynneh pynsah ïa ka lariti bad kolshor ha ka jylla.
U Myntri shuh shuh u la pyntip ba un sa leit jurip ruh kylleng ka jylla ban tohkit ïa ka jinglong jingman ki jingtei nam ki menbarim bad ban leh ïa kaba donkam.
“Ngan ym ïaid lait ïa ki MLA, MDC, hynrei ryngkat lang bad ka tnat kaba nga peit, ngi sa leit lang ban peit kaei kaba jia, kaei kaba bakla, kaei kaba dei. Kumta, ngin sa leh da ka tnat,” u la ong.
U la ïathuh ruh ba ki map jong ki jingtei kiba la rim ki la don lypa, bad ka jingïalang pyrkhat kam kan sa long ha ka taiew ban sa wan na ka bynta ban ïathir sani bniah kumno ban pyntyllun shakhmat ïa ka kam.