Tang shu rang u slap yn trei noh ki ar tylli ki Kompani ïa ka surok bah NH6 ha ka jinglut ba 230 klur

Shillong, Naitung 3 : U Symbud Myntri Rangbah ka jylla uba dei peit ia ka tnad PWD u bah Prestone Tynsong mynta ka sngi Balang ula ïathuh ba ka jingtrei ïa ka surok NH6 kan sa sdang noh tang shu la rang u slap da ki ar tylli ki kompani kiba la aiti ïa ka kam ha ka jinglut kaba 230 klur tyngka.
“ ïa ka kam la dep aiti sha ki ar tylli ki kompani bad shen yn sdang trei noh ïa ka surok NH6 tang shu rang u slap” ïathuh u bah Prestone ha ki lad pathai khubor.
Kat kum ka kaiphod ba la ai da ka sorkar sha ka ïing Bishar High Court jongka jylla ha ka 21 tarik Jylliew 2024 la pynpaw ba ha kaba ïadei bad ka surok naduh Jowai shaduh Rattacherra jongka NH 6 kaba ka jingjngai ka long 102.225 Km la dep pykhreh lut nadong shadong ban trei noh bad ïa ka kam la aiti ha ki ar tylli ki kompani kawei ka M/s Purbanchal Buildtech Pvt.Ltd bad M/s Dhar Construction Compani ban trei tang shu la rang u slap.
Ka jingpyndap ïa ki thliew ki syar ruh ka la ïaid hi hynrei namar ka jingjur u slap bad ba bun palat ki kali ba ïaid kumta ka jingjulor ka jur beit.
Kaba kongsan ka long ban shna pynskhem bha ïa ka surok khnang ban lait na ka jingjulor kloi.
Na ka liang u Symbud Myntri Rangbah ula ïathuh ba katba ka jingtrei pynbha ïa ka surok ka dang ïaid kin peit ruh ba kan ym don ka jingktah ïa ki pipe bad ïa ka ïaid ka ïeng ki paidbah.
La ïathuh ruh ba ka jingpynbha ïa ka surok ka lah ban shim por kumba shisnem ei ei hynrei na ka liang ka sorkar kan bthah ïa ki kompani ban pynsted ïa ka kam ban pyndep la kumno kumno hapoh ka 6 bnai ei ei.
Kane ka surok ka dang don mynta hapoh ka jingbishar ka ïing bishar High Court hadien ba la don kiba leit ujor mukotduma halor ka jingsniew palat ka surok bad ka ïing bishar kan shong bishar biang ha ka 27 tarik u bnai Nailar 2024. Na ka liang ka ïing bishar ka la bthah ruh ïa ka NHAI ban ai jubab hakhmat ka ïing bishar halor ka jinglong jingman ka surok hapoh ka 8 tarik u Naitung 2024.