Tang shu lait u Myntri Rangbah yn pyllait paidbah noh ïa u QR Code ha ki bilor jingdih

Shillong, Nailar 28 : U Myntri ka tnad Excise ka sorkar Jylla, Bah Kyrmen Shylla, u la ong ba shen ka sorkar kan sa pyntreikam noh ïa ka jingpyntreikam ïa ka QR code based tracking system ha ka tnad excise ban pynthikna ba kan nym don kano kano ka jinglait ei ka khajna sharud jong ka pla tyngka.
Haba kren bad ki lad pathai khubor, u Bah Kyrmen u la ong ruh ba nyngkong ki la buh ban sdang pyntreikam noh naduh u Nailar hynrei hadien la pynjlan noh shwa na ka daw ka jingkyrpad ki nongdie bad khamtam eh namar ki kwah ban don lang u Myntri Rangbah ha ka sngi ba ki pyllait paidbah.
Katkum ka jingong jong u, ka tnad ka khmih lynti ba ka jingpyntreikam noh ïa une u QR Code kan long ha shwa ban sdang ka Dorbar Mangtyngka kaban sa long shen hynrei kata ruh ka shong pat ha ka jinglait jong u Myntri Rangbah ka Jylla.
Haba jubab halor ka jingkylli, u Myntri u la ong ruh ba ka tnad ka dang trei shitom ban tam ïa ka jinglum khajna jong u snem ba la dep.
Watla um shym la don ïa ki jingkheiñ kiba thikna bad u, hynrei u myntri u la pynthikna ba ka tnad ka ïaleh ban pynurlong ïa kane ka thong.