Tang shu dep ka elekshon baroh kin phai sha ka NPP kaba ïalam ïa ka sorkar jylla : Conrad
Dalade hiar sha Shella ban ïalap elekshon na bynta u Ethan
Shillong, Rymphang 17 : U National President ka NPP ba dei ruh u Myntri Rangbah ka Jylla Conrad K Sangma ha ka sngi Nyngkong u la hiar hi dalade sha Dalia kaba hap ha Shella constituency ban ïalap elekshon na bynta u kyrtong ba ka party ka pynieng, kata u samla Ethan Kharpuri.
Ha kane ka jingïalang la wan ban sakhi da ki hajar ngut ki paidbah nongkyrshan ka party kiba la wan lang khrui na sawdong katei ka thaiñ kaba ha khappud bad ka Bangladesh.
Na ka liang u Conrad haba kren ha kane ka jingïalang u la kubur ba ki paidbah ba sah ha ki khappud jong ka India Bangladesh ki mad shibun ki jingeh bad kumta dei tang u nongïalam uba don shisha ka bor uba lah ban weng ïa ka jingeh jong ki.
Shuh shuh u ong ruh ba kane ka elekshon MDC kaban long ha ka 21tarik mynta u bnai kan dei ka kabu ksiar na bynta ki nongshong shnong jong ka Shella constituency ba kin jied ïa u nongïalam bad u nongmihkhmat u ban ai ka jingshakri bad ruh ban long ka jingkieng hapdeng jongki bad ka sorkar jylla.
“Une u MDC um dei tang ban mihkhmat ïa ka Shella constituency sha District Council hynrei ban long ruh ka jingkieng ïa ki paidbah ka Shella bad ka sorkar jylla,” u la ong.
Da kaba kyntu ïa ki paidbah ba kin jied ïa u Ethan Kharpuri kum u MDC ba thymmai jong ki, Conrad u la pyntip ruh ïa ki paidbah shaphang bun ki skim bad ki jingmyntoi kiba ka sorkar ka la ai na bynta ki paidbah na Shella bad kiwei pat ki thain khappud jong ka Meghalaya.
Haba kynthoh pat ïa ki party ba kynthoh pyrshah ïa ka NPP, u Conrad u la ong ba dei tang lyngba ka vote jong ki, kaba lah ban ai ka jubab kaba biang ïa ki. U ong ruh ba ka NPP ka don ha ka sorkar bad kumta hadien ka elekshon baroh ki party kin phaikhmat sha ka NPP ban pynsngew ïa ka jingeh jong ki.
Ha kane ka jingïalang la donlang ruh ka kyrtong jong ka NPP na Nongshken Kong Grace Kharpuri kaba dei ruh na Kmie jong u Ethan bad ruh ka MDC kaba la jop la lai sien lynter. Nangta la donlang ruh u nongïalam ka NPP Bah Bajop Pyngrope nalor kiwei kiwei ki nongïalam ka party.