Tang na u kwai nga kamai da ki lak tyngka shisnem: Saleng Marak

Nongstoiñ, Rymphang 08 : Ki mar rep ba kongsan kum u kwai, tympew, ka kait, sla tyrpad, sohmrit khlaw bad synsar ki dei ki mar rep kiba kyrshan bor bah na ka bynta ki paidbah nongshong shnong kiba don ha khappud ka West Khasi Hills bad ka Assam.
Dang ha ki khyndiat sngi ba la dep ha ka jingleit ïakynduh bad ki paidbah kiba shong ha khappud bad ka Assam ba kynthup naduh Ranighat, Salpara, Malapara, Umshiak bad kiwei kiwei ki shnong kiba don harud ka wah Gijang, la lap ba ki paidbah nongshong shnong ha kitei ki thaiñ, ki im da ka rep ka riang bad ki long ki nongshong shnong kiba pahuh pahai namar ka jingtrei shitom.
Kaba kham sngewtynnad ka long ba ki nongshong shnong ha kitei ki thaiñ wat la ki dei ki nongrep, hynrei ki ïabeh bha ruh ïa ka pule dangle bad ki kmie ki kpa ki da shimkhia bha ban phah skul ïa ki khun jong ki.
Haba ïakren bad u Bah John Sangma, u la ïathuh ba watla ki samla kiba la nang la stad ki bun bha ha katei ka thaiñ, hynrei ki shem jingeh bha ban ïoh rung ha ki kam sorkar, namar ba ki dei ki shnong kiba ha kyndong eh. Lada don ki kam sorkar kiba lait ruh, kim da kham ïoh ïa ki jingtip ha ka por kaba biang. Kumta wat haba ki la dep ïa ki jingpule ruh ki hap ban minot ha ka rep ka riang, namar kane ka dei ka kam kaba ki lah ban ieng skhem ha la ki kjat na ka bynta ka kamai kajih.
Uwei na ki nongrep u Bah Saleng Marak, u la ong ba tang na u kwai bad ka kait, u lah ban kamai da ki lak tyngka ha ka shi snem. U la ong ruh ba ha ka bri kwai, u thung ruh da ki dieng kait ha ki jaka ba lait bad ka da pynitynnad shisha ïa ka mariang, namar baroh saw aïom katei ka jaka ka jyrngam sah. U la ong ruh ba nalor ki dieng kait bad ki dieng kwai ki don ruh ki dieng bah diengsan kiba pynitynnad haba peit na shilliang ka wah Gijang.