Ka kam saiñ pyrthei, ka dei ka kam kaba jyrwit sohsat bad ka dei ruh ka bym ju don ba ïa beit satia halor kano kano ka ishu bad kaba ngi dei ban tip bha, ka long ba ki riew saiñ pyrthei, ki leh ïa kaba kim kren bad ki kren ïa kaba kim mut ban leh bad ka nuksa kaba shai bha, ka long kato kaba ki heh NPP, ki ju ong ba haba lap ïa ka jingbamsap, kumta dei ban ai ejahar sha ki pulit bad katei ka pyni, ba halade ki la shai bha, ba katei ka jingkynnoh ka dei kaba shisha, hynrei haba kim lah ban ïada, kumta ki leit ngiat noh sha u pulit.
Haba ïa kren mynta sha ka seng thymmai VPP, ngi lyngngoh, ba hap ban ïa beh seng kat ïa U MLA, tang na ka daw jong ka tiket MDC bad lada ka long kumta, ka wan ka mat, ba dei ban beh ïa kito kiba jied kyrtong ïa U MDC ka Jowai North, uba dei u dkhot ba pura jong ka seng TMC bad uba ïakhun ïa ka elekshon MLA na katei ka seng bad dei ruh ban beh ïa kito kiba pynduh tiket ïa u kyrtong uba nyngkong ha Nongstoiñ bad bujli da uwei pat bad kumjuh dei ban beh seng, ïa kito kiba jied kyrtong sha Jaiñtia hills, namar ba wat la ka lyer jong u prah ka beh bha sha Jaiñtia, hynrei kam lah ban wan rah ïa ka jingjop kaba biang briew ban thaw EC ha Jaiñtia hills District Council.
Lada ïakren beit thik, tang ïa ka jingjied tiket MDC, kumta ngi hap ban sngewthuh ba uwei pa uwei u briew, u don la ka jong ka jingmut bad ka jingkwah bad khamtam haba ka parti lei ka khlaiñ bad ha ka elekshon MDC kaba dang shu dep ruh, ki don bun kiba pan tiket na ka seng VPP, hynrei haba duh tiket ruh, ki ïai neh hapoh katei ka parti bad haba ïa dei bad ka Jaïaw Constituency ruh, la ïohi ba U bah Adelbert, u don la ka jong ka jingmut ha kaba ïadei bad katei ka phang, hynrei wat la u kyrtong jong u, um shym ïoh tiket, u ïai neh hi bad katei ka seng bad um shym la ïaleh pyrshah satia bad ki kyrtong jong ka seng, ki la jop na Jaïaw bad na Mawkhar Constituency.
Kumba la kren haneng, ka jing ïaknieh tiket, kam shym la jia phylla tang ha ka seng prah, hynrei ha baroh ki seng saiñ pyrthei bad la ju kynmaw bha, ba ha ka por ba ka dang khie rasong ka seng Congress, ba ka tiket ka dei kaba da rem jubor haduh katta katta, ha kaba ki don bun kiba leit thied rem naduh Delhi bad kam dei hi tang ïa ka Congress, hynrei ha baroh ki seng saiñ pyrthei; tangba lada shu ïa phoi noh, tang na ka daw jong ka jingduh ne ïaknieh tiket, kumta ka kylla kam khyllung noh.
Ha kajuh ka por, ka don ruh ka jingshisha, ba lada jied tiket na Jaïaw, kumta ka donkam ïa ka muhor kaba heh bad kaba shai bha na ki nongkyrshan jong katei ka seng kiba hap ha Jaïaw Constituency bad kam lah ban long ba ki Nongïalam jong ka seng prah, kiba na Mawlai, na Nongkrem ne na kiwei ki jaka, kin tuklar ma ki, khlem ka jingai jingmut jong ki trai Constituency bad lada ka don kaba kum kata, ka dei hok ban ong, ba ka dei ka jingïoh roit ïa ka hok jong ki nongjied ne ki trai Constituency.
Ki nongialam jong u prah, ki lah ban kheiñ sting, ba da kaba ki duh ïa uwei u MLA, ba kam don jingktah satia ïa ki, hynrei katei kan dei ka sur briew bad ka sur blei, ka ban plie lad ban pharia ïa katei ka seng, ha kiba bun bynta bad kawei kaba lah ban jia noh, ka long ba kin sa mih ar tylli ki seng VPP, lyngba ka buit pynïashrut briew jong ka MDA bad kane kan nang ailad shuh ban pharia sa ïa ki MDC, kiba don mynta ha Khasi bad Jaiñtia hills.
Ki nongïalam jong ka seng VPP, ki dang shu mad ïa ka elekshon MP, ha kaba ki la jop donburom bad ki la nang hiar ha ka elekshon MDC, khamtam ha Jaiñtia hills bad ki hap ban sngewthuh bha, ba ka elekshon MLA, kan wan da kawei pat ka sur, namar ba ka jingïakhun ïa ka MLA, ka dei kaba jubor haduh katta katta, ha kaba ki seng saiñ pyrthei, ki sei lut plaiñ, ïa ka bor buit bad ka bor spah ruh kumjuh.
