Tang na ka bynta u snem 2024-25: Haduh `4.35 klur la siew sha 36 ngut ki Consultant bad 59 tylli ki Consultancy Firm

Shillong, Rymphang 17: U Myntri Rangbah ka jylla u Conrad K Sangma haba jubab ïa ka jingkylli u MLA ka Mawryngkneng u Bah Heavingstone Kharpran halor ka jingthung ïa ki Consultant ha ka dorbar mang tyngka u la pyntip sha ka ïing dorbar ba ki don 36 ngut ki riew shimet bad 59 tylli ki Consultancy Firm kiba la thung da ka sorkar ha ki tnad treikam bapher bapher.
U Myntri Rangbah ka Jylla ula pyntip ba ka jinglut baroh ha ka shi snem ha ka jingsiew ba man u bnai ïa ki Consultant shimet shimet ka long T. 4.35 klur na ka bynta u snem 2024-25.
Katkum u Myntri Rangbah, ïa ki Consultancy Firm ki ju shah siew ym kum ka tulop ne jingsiew man u bnai kum ki nongtrei sorkar hynrei ki shah siew ïa ka bai ai jingmut kaba long katkum ki kam ba lah ban pyndep katkum ka jingïateh.
Hynrei u Sangma u la pyntip ba ïa ki 59 tylli ki consultancy firm la siew T. 131 klur bad T. 116 klur haduh 85 percent ba la siew lyngba ka pisa na ki projek ba la iarap na ka Externally Aided Projects (EAPS), kumba T. 5 klur kaba wan na ka sorkar pdeng bad T. 10 klur na ka sorkar jylla.
U Myntri Rangbah ka Jylla u la pyntip ruh ba namar ki Consultant ka jylla ka la lah ban ïoh ïa ka pisa kaba kumba T. 12000 klur hapoh ki EAPs, kaba heh tam ha ka thain shatei lam mihngi bad ka long ruh ha kajuh ka kyrdan bad kiwei pat ki jylla jong ka ri.
U la pyntip sha ka iing dorbar ba ki Consultant bad ki Consultancy Firm ki pynkhreh ïa ki Detailed Project Reports, ki bynta jong ka mariang bad ka imlang sahlang, ki kam ha ka jingthied mar nalor kiwei kiwei.
U Sangma u la kdew ruh ba ki agency kiba bei pisa kidei kum ka World Bank bad ka Asian Development Bank.
U myntri rangbah u la pynduna ïa ka jingtieng ba ki Consultant ki lah ban shimti ïa ka bor bad ka kam jong ki ophisar sorkar wat haba u la bynrap ba kim shim ïa ki kam sorkar hynrei ki dei ki “mandated expertise” kiba donkam katkum ki kyndon jong ka projek.
“Ki jingkitkhlieh jong ki ophisar sorkar ki dei ki bor ba la ai ha ki bad ym lah ban shim noh ïa ki”, la ong u Sangma.
U myntri rangbah u la ong, ka kam ba kongsan jong ki Consultants ka long ban kyrshan ïa ka rukom trei kam bad la batai ïa ki bynta jong ki.