Tang kumba 6% na ka mang tyngka ha ka ri la pyntreikam ha ka Education: Satya Pal Malik

Shillong, Jylliew, 28: U Lat ka Jylla u Satya Pal Malik ha ka sngi Baar u la ong ba tang 6% na ka mang tyngka jong ka Sorkar Pdeng la mang sha ka tnat Pule Puthi.
Ïa kane u Lat u la kren ha ka jingplie paidbah ïa ka ing skul bad kolej ba thymmai ba la ai kyrteng Shri. Kanchi Kamakoti Vidya Bharati Vidyalaya, ha Them Mawbah, Shillong.
U Lat u la ong ruh ba ïa ka pule puthi hapoh ka ri India ym shym la pynlong kum ka shlem kaba kongsan.
“Tang kumba 6% na ka Mang Tyngka ha ka Ri la pyntreikam ha ka tnat Pule Tuthi, katba ki skulbah ha ka ri USA bad ha ka ri UK ki la ïoh pdiang da ki spah tylli ki Nobel Peace Prize, hynrei ha India ki long tang 12 tylli,” la ong u Lat.
U la ruh ba ka pule puthi ha ri India ka dang sahdien haduh katta katta na ka daw ka jingbym shimkhia. U la banjur ba donkam ban nang ïa ka pule ka dangle bad ka jingpynkupbor ïa ka imlang ka sahlang ka dei tang lyngba ka jingnang jingstad.
U Lat u la ïaroh ïa ka Kanchi Kamakoti Shankara Health, Education and Charitable Trust kaba la shim ïa ka jingkitkhlieh ban noh synñiang sha u sup u thiar ban kyntiew ïa ka imlang ka sahlang
Ïa kane ka ingskul ba thymmai la tei ha ka jaka ba la noh synñiang da ka longïing Geonka, Shillong bad kaba la ai jinghikai sha ki khynnah skul haduh Class-X naduh u snem 2004.
Katba ïa ka ing ba thymmai jong ka Kolej la tei da ka Kanchi Kamakoti Shankara Health, Education and Charitable Trust bad ïa ka jingpynrung skul ïa ki khynnah la leh da ka Purvottar Janajati Shiksha Samiti bad ka Meghalaya Shiksha Smiti.
Ha kane ka sngi, u MLA ka West Shillong Constituency u Bah M. Rapsang u la noh synñiang T. 15 lak na ka bynta ki jingdonkam jong kane ka skul, katba u Pralad Toor u la noh synñiang da ka jaka ban shna ïa ka skul ha Nongpoh.
Kiwei kiwei kiba la kren ha kane ka sngi ki long u Director jong ka NEIGRIHMS, Shillong u Dr. Nalin Mehta bad ka Padmashree Patricia Mukhim kiba la long kum ki symbud kongsan.