Tang ki samla ba la don lypa ha ka ri ym lah pynbiang, thmu ka Sorkar ban pdiang na kiwei ki ri: KSU

Nongpoh, Lber, 29: Ka jingpynmih jong ka sorkar India ïa ka rule jong ka Citizenship Amendment Act 2019, ka la pynlong ïa ka seng KSU ban nang pynjur ïa ka jingpyrshah ïa katei ka aiñ ïakjakor bad na ka liang ka KSU North Khasi Hills District mynta ka sngi ka la thang syndon ïa ki kyndon aiñ jong ka Citizenship Amendment Act 2019 hadien ka jingïalang kaba la long ha ïew Mawlong bad na ka liang ka seng ka la kren shai ba kan nym pdiang da lei lei ruh ïa katei ka aiñ ban pyntreikam ha ka jylla bad ban pyrshah haduh ba kut.
Ha katei ka jingïalang ban pyrshah ïa ka CAA la don lang naduh u Bah Ferdinald Kharkamni President, Samla James Hitler Mawphñiang General Secretary, Bah Lambok Rymbai Vice President ka KSU North Khasi Hills District, kynthup ruh kiwei kiwei ki nongïalam sengbhalang, ki nongïalam shnong bad ki riew rangbah.
Haba kren ha katei ka sngi na ka liang ki nongïalam ka KSU ki la kren shai sha ka sorkar ba kum ka seng kan nym pdiang da lei lei ruh ïa katei ka aiñ bala pynbeit thymmai da ka sorkar BJP kaba long ka jingkhang bah khamtam ïa ka thaiñ Shatei Lam Mihngi ban khot nongshong shnong ïa ki jaitbynriew na ka niam Hindu, Sikh, Buddhist, Jain, Parsi bad ki khristan na ka Ri Bangladesh, Pakistan bad Afghanistan.
Ki la ong ruh ba ka daw bah ba kum ka seng ka pyrshah jur ïa kane ka aiñ ka long namar ba ka jylla Meghalaya ka don markhap bad ka ri Bangladesh bad haduh mynta ka jylla kam pat don kano kano ka aiñ kaba ïada na ka jingwan rung kyrthep jong ki mynder watla na ka liang ka sorkar ka la pynksan ba katei ka aiñ kan nym treikam satia ha ki jaka ba hap hapoh ka sixth schedule, hynrei kum ki nongïalam ka seng ki sngew ba kane ka long ka jingplie lad ïa ki jaitbynriew heh na ka ri Bangladesh ban wan tur bad tyllep ïa ka jylla rit paid jong ngi kaba don tang shi troh ki nongshong shnong namar ka ka Sixt Schedule kam lah ban tehlakam satia ïa ka jingwan rung ki mynder bad bar jylla sha kane ka jylla.
Ki la pynkynmaw ruh ba na ka liang ka seng ka la pan bad dawa ïa ka ILP ha ka jylla hynrei haduh mynta ka sorkar India ka dang buh sha kyndong almari jong ka Ministry of Home Affairs ïa ka Resolution bala mynjur da ka iing dorbar thawaiñ ha u Nohprah jong u snem 2019.
Ki la ong ruh ba kum ka seng kam kwah ba ka jaitbynriew jong ngi kaba don tang shi troh kan shah tyllep noh ha ki mynder, bad kam kwah ba ki trai muluk kin long tang ki nongtong um bad nongthohdieng jongno re jong no kumba la kren da u Soso Tham naduh ki por ba mynshuwa hynrei kum ka seng kan pyrshah ïa katei ka aiñ bala lam khmat da ka NESO ha ka thaiñ Shatei Lam Mihngi baroh kawei ba ka mukotduma ka dang ïaid mynta ha Supreme Court.
Namarkata na ka liang ka seng ka la kyrpad sha ki paidbah ban ai ka kti kadiang ka mon ban pyrshah ïa katei ka aiñ ba da lei lei ym dei ban pyntreikam ha ka jylla namar tang ki nongshong shnong bala don lypa ka sorkar kam pat lah ban pynbiang mynta pat ka thmu ban wanrah sa ki nongshong na kiwei kiwei ki ri.