Tang ki jingduna suda ha Sub Centre Nongmisei

Nongstoiñ, Naitung 29: Ha ka jingleit jurip jong ka KSU Misei Unit ïa ka Sub Centre, la lap ïa shibun ki jingduna ha katei ka jaka ai jingsumar kum ki jingthiah, jaka leit bar jaka sait kti, jaka ap, pipe um, jaka buh ñiut, ka jingker kut ïa katei ka jaka ai jingsumar, jaka theh ñiut, thyrnia injek, ki dawai bad don tang iwei I A.N.M.
Kumba long mynta katei ka jaka ai jingsumar wat ka tnum ruh ka la jaw, ka light ruh kam biang, ka um ruh kam biang ha katei ka sub center, kaba buh jingeh shibun wat ïa kiba trei hangtei, namar don ki nongpang ba wan ha ka miet ka iong. Kumta ka buh jingeh bha ïa kiba trei ha katei ka sub center.
Shuh shuh ki staff nurse ruh ki don tang ar ngut ha katei ka jaka ai jingsumar, kane ruh ka buh jingeh shibun namar kane ka jaka ai jingsumar ka peit haduh 23 tylli ki shnong.
Ki nongïalam jong ka seng bad ki nongïalam shnong ki la buh jingkyrpad ba ka sorkar ka dei ban phah sah kawei ka ANM sha katei ka jaka. Namar ki kwah ba ki staff nurse ba trei hangtei kin don tista ha ka jaka trei, namar kane ka shnong ka la kham pajih na Riangdo CHC.
Ka Khasi Students Union ha ka jingïalam u samla Before Nachugre Assistant General Secretary lem bad ki dkhot, ha ryngkat ki nongïalam shnong jong ka shnong Misei u Chester Ryntong Secretary jong ka shnong, ha ka sngi saitjaiñ, ki la ïoh ban leit jurip khnang ïa ka Sub Center kaba hapoh ka shnong Nongmisei West Khasi Hills District, halor ka jingud ki paidbah.
Ha kajuh ka por ka kyntu ïa ka sorkar lem ïa I Myntri ba khmih ïa ka tnad ka koit ka khiah, ban pynbiang ïa kitei ki jingduna ha katei ka jaka ai jingsumar, khnang ba kan long ka jingmyntoi na bynta ki nongshong shnong jong katei ka thaiñ.