Shillong, Jylliew 25 : U Myntri ka tnad C&RD ka sorkar jylla ba dei ruh u MLA ka Mylliem ha ka sngi Saitjaiñ u la ong ba tang ka sorkar ne ki pulit kin ym lah shuh ban ïakhun pyrshah ïa ka jingjyllei u drok ha kane ka jylla.
Haba kren ïa kane ha ka jingïalang ban pynshai paidbah ha ka jingïalang pynshai paidbah halor u drok ba la pynlong da ka Dorbar Shnong Lummawba hha ha Shonroy Basan Secondary School, Lummawbah, u Myntri u la ong, “Donkam ka jingïatrei lang ryngkat ryngkat jong baroh namar tang ka sorkar lane tang ki pulit kin ym lah shuh ban tehlakam ïa kane ka.”
Na ka liang jong u, u kyntu ïa baroh ki nongshong shnong ba kin mih shakhmat ban ïasnoh kti lang ban rat dyngkhong ïa ka jingïohlad jong u drok ban rung ha ki kyndong kynshrot jong ka jylla.
U Bah Hamlet u ong ruh ba ka jingnang bun ki samla kiba ngop ha u drok kadei ka jingjia kaba pynsyier haduh katta katta ïa ka imlang sahlang. U ong ruh ba kane ka ishu ba ïadei bad u drok kam dei shuh kaba tang hangne hynrei kadei ka ishu kaba la ktah ïa ka pyrthei baroh kawei. Hynrei u ong pat, ba kan dei pat ka sienjam kaba paka lada kano kano ka imlang sahlang ka mih ban ïakhun pyrshah ïa kine ki jingeh.
Ha kane ka sngi la ïoh ruh ïa ka jingbatai bad ka jingpynshai kaba kham bniah halor ki jingma bad ki jingktah kiba mih na kaba pyndonkam ne ngop ha u drok bad kumno ban ïada na ki nongkren kiba tbit kynthup ïa u Bah W Nongneng, Officer in Charge, Jhalupara Outpost bad Kong BW Sohkhlet, Assistant Professor (Sociology Department), Umshyrpi College, Shillong ha ryngkat ka jingdonlang i Dr. Badaplin War, Bah E Thangkhiew, Rangbah Shnong ka Lummawbah, ki dkhot jongka Dorbar Shnong nalor kiwei kiwei.
