Tang ka kam sam sha bad sar kamra, ïoh ki trai ri trai muluk ha ki karkhana dewbilat: KSU

Shillong, Nohprah 10: Ka KSU West Jaiñtia Hills District ka la ïathuh ba ki Khasi bad Pnar kiba ïoh kam ha ki karkhana dewbilat ki dei tang ban trei ïa ki kam rah sha ne sam sha bad ki kam sar ïa ki kamra jong kine ki karkhana dewbilat.
Ïa kane ka la ïathuh ha ka sngi balang haba kren bad ki lad pathai khubor haba pynpaw ïa ka jingpyrshah ïa ka jingthmu ka sorkar bad ka North East Frontier Railway (NFR) ban wanrah ïa la lynti rel sha ka thaiñ Jaiñtia Hills.
Ka seng ka la pynkynmaw ba ki karkhana dewbilat ha ki por mynshwa ha shwa ba kin wan seng sha ka thaiñ Jaiñtia Hills ki la kular ban aikam ïa ki samla bad ki briew jong ka jylla, hynrei ka long pat kaba sngewsih ba naduh ba ki la wan seng haduh mynta ki Khasi ne Pnar kim ïoh satia ïa ki kam ki jam, hynrei kiba bun dei hi ki nongtrei bar jylla kiba wan na kiwei ki jylla.
“Kumba la ïohi bad shem, la lap ba ki jaitbynriew jong ngi kiba ïohkam ha ki karkhana dewbilat dei tang kiba shu sam sha bad sar kamra, kumta kiwei pat ki kam kiba kham biang ka jingsiew la trei hi da ki bar jylla, kumno keiñ kan ai jingmyntoi ka jingwan kine ki karkhana,” buh jingkylli ka seng.
Ka la ïathuh ruh ba ha ki por mynshwa kine ki karkhana shna ne pynmih dewbilat ha Jaiñtia Hills kim don wat tang kawei ruh ka trok dumper ne kano kano ka trok kit ïa u dewïong bad ki pyndonkam da ki trok kiba na ka thaiñ ne na kane hi ka jylla, hynrei mynta pat ki la don da ki spah tylli ki trok dumper bad ki kit hi ïa ki mar ba la dep shna sha ki jaka ba ki thmu ban pynpoi.
“Dei halor kane ba ki trok ha kine ki sngi ba la dep ki sa ïakhih ïa ka jingleh jong kine ki karkhana dewbilat,” ong ki nongïalam ka KSU.
Ka KSU ka la kynnoh ruh ba ka jingthmu jong ka sorkar ban wanrah ïa ka lynti rel ka dei ruh kum shi bynta ban pynsuk ïa kine ki karkhana ban kit ïa ka dewbilat ha ka dor kaba tat sha kiwei pat ki jylla bad kumjuh ruh ban ïoh kit da kaba suk ïa ki marpoh khyndew kiba don ha kane ka jylla sha kiwei pat ki jaka.