Tang ka jingbabe suda, phla ki briew kiba la lait na ka jingteh mraw u drok

Shillong, Lber 30 : Ki dkhot jong ka Meghalaya User Forum (MUF) kaba dei ka kynhun jong ki briew kiba la lait na ka jingshah teh shah khum ha u jingdih ba sniew u drok kila pynpaw ba ki dap tang da ka jingbabe halor ka jingjied bakla ïa ka lynti mynba ki dang sdang ha ka por ba ki dang don ha ki skul.
Ïa kane ki dkhot jong ka MUF kila pynpaw ha ka awareness programme kaba la pynlong da ka seng long kmie jong ka shnong Nongrah ïa kaba la kyrshan lang da ka Dorbar Shnong Nongrah, Shillong.
Ïa kane ka awareness programme la pynlong mynta ka sngi ka 30 tarik u Lber bad ïa kane la pynlong ha St. Dominic Higher Secondary School, ha kaba la wan ban ïa shim bynta lang ki khynnah skul naduh class V haduh class X, ki nonghikai bad kumjuh ruh na ki kmie jong ki khynnah skul.
Haba kren kyllum kine ki dkhot kiba la ai jingkren kila ïathuh ba kila sdang ïa ki jingdih ba sniew naduh ka por ba ki dang don ha skul haduh ban dap poi shaduh ki kyrdan pule B.A.
Kine ki dkhot kila pynpaw ka jingbabe halor ka jingjied bakla ïa ka lynti ïaid mynba ki dang don ha ki skul bad hadien pat ki dap tang da ka jingbabe suda namar ba kim shym la sngap ïa ka jingsneng jingkraw jong ki hymen bad ki kmie ki kpa.
Kumta kila kyntu ïa ki khynnah skul ba kim dei ban bud ne ban jied ïa ki lynti kiba bakla hynrei kidei ban kohnguh ïa ki jingsneng jingkhraw jong ki kmie ki kpa bad kumjuh jong ki nonghikai ban lait na kino kino ki jingsniew ki ban wanrah tang ki jingbabe ha ka jingim hadien habud.
Na ka liang u Bah Barry Leslie Kharmalki uba dei u General Secretary jong ka MUF u la pynpaw ba ka jingngop jong u ha u drok kadei na ki paralok ha ka por ba u dang leit skul tad haduh ban da pyndep ka jingpule, hynrei kila lait na ka jingshah teh mraw ha u drok, kumta u la kyntu ïa ki khynnah skul ba kin kiar na ki paralok kiba ju mlien ïa ki kam ba sniew, bad kidei ruh ban kiar na ka jingshong kha khynnah.
U Bah Jerry Nongrum uba dei u President jong ka MUF u la pynpaw ba shisien ba la kyrni la jynjar bad lait namar ba ïa ka jingpang kyrni wat ki stad science ruh kim pat lah lap ïa ki dawai ban pynkoit ïa ki bad kane ka jingpang jingkyrni kadei kaba ym lah ban pynkoit.
Shuh shuh u la ong, ka long kaba donkam ban kren bad pynsngewthuh sha phi ki khynnah skul ba lada ki don kino kino ki jingeh ha ka jingim wat leit ha ki jingpynshoi ban dih la ka dih da kaba ong ngan dih tang shisien ym lei lei re, hynrei tang shu ngop phin sahkut da ki phew phew snem bad ïa kane baroh ki nongdih drok kim ïohi ne pyrkhat.
Na ka liang jong u Bah Zion Marwein uba dei u dkhot jong ka MUF uba dei ruh AD jong ka Meghalaya Aids Control Society (MACS) u la batai ha kaba ïadei bad ka jingpang HIV AIDS bad kumno ki briew ki ïoh ïa kane ka jingpang bad ruh kumno ka ïabit.