Tang ka ILP kaba lah ban peitngor na ka jingwan ki briew nabar sha kane ka jylla, ong ka HYC bad CoMSO

Shillong, Jylliew 09: Ka Hynñiewtrep Youth Council (HYC) ha ka sngi Nyngkong ka la dawa ïa ki bahaïing jong baroh arngut ki shikurim kaba dei jong u Raja Raghuvanshi bad ka Sonam Raghuvanshi ba ki dei ban pan mab paidbah ba ki la kynnoh lai phew jait ïa ka jylla Meghalaya bad kyrpang khamtam ïa ki nongshong shnong jong ka Sohra bad ha kajuh ka por ka la ong ba tang ka ILP kaba lah ban peitngor na ka jingwan ki briew nabar sha kane ka jylla bad ki jingthmu jong ki.
Halor kane haba iakren bad ki lad pathai khubor u President ka HYC Sengkmie u Bah Roy Kupar Synrem u la ong ba hadien ba la jia kane ka jingjia, na ka liang ka seng ka la pynpaw ïa ka jingsngewlem ïa ki bahaïing jong u Raja uba la shah pynïap na ka jingwan jngohkai sha kane ka jylla bad sha ki thaiñ Sohra, hynrei la ïohi pat ba lyngba kane ka jingjia ba ki la mih ki jingshah pynrem, shah kren beiñ, shah byrngem, jingpynsngewthuh bakla, ka jingshah khot da ki kyrteng bapher bapher khamtam na ki lad pathai khubor na ri thor kiba la ïohi ïa ki jingwanrah jong ki ïa ki khubor bapher bapher ban pyni ba ki briew kane ka jylla ki long ki riewkhlaw, ki nongpynïap briew, ki nongpynïap dusmon.
“Ka long kaba sngew thamula ba wat ba la mih ki jingshisha ki dang don hi na ka liang u kpa jong ka Sonam ba u dang ïai kynnoh hi ïa ka jylla Meghalaya, ki kynnoh ïa ka tnat pulit, ïa ki bor sorkar ki kynnoh ïa baroh kiba la don bynta, hynrei kim ïohi pat ïa ki jingtrei shitom jong ki tnat bapher bapher bad khamtam eh kito ki nongkiewlum na West Jaintia kiba la wan ban ai ka kti ka mon ka kti ka diang halor kane ka kam bad kaba phylla ka long ruh ba kumno kata ka briew ka la poi sha Uttar Pradesh bad ban ïohkem ïa kiwei pat kiba la donkti ha kane ka jingjia bad kane ka pyni shai kdar ba ki nongshong shnong bad ki briew kiba sah ha thaiñ Sohra kim don bynta eiei halor ka jingïap jong une u briew bad jah rngai kane ka kynthei, lehse kane kadei ka jingpyrkhat lypa naduh ka shnong ka jong ki ka jylla ka jong ki, hynrei ki wan pat ban pynïap ha kane ka jylla ka jong ngi bad pynbud nam ïa ngi,” ong u nongïalam ka HYC.
Ha kaba ïadei bad kine ki jingjia baroh na ka liang ka HYC ka la dawa na ka sorkar jylla ban pyntreikam noh mardor ïa ka ILP khnang ba kan pynsuk ïa ki briew jong ka aiñ ban lap ïa ki briew kiba wan nabar, ka jingrung jingmih jong ki briew, ban tip mynno ki wan bad lano kin leit phai biang, hangno ki rung, katno sngi kin sah bad kita ki briew ki la leit phai ne em.
Haba maham ïa ki briew kiba pynbudnam sniew ïa ka jylla u President ka HYC u la ong, “Haoid ngi dei ki briew kiba rit paid, kiba lui lui bad kiba kwah ïa ka suk ka saiñ, hynrei lada don pat kiba pynthut ïa kane ka jinglong.”
Haba ïadei pat bad ka jingshah byrngem ha uwei u briew lyngba ki lad social media uba ong ba dei ban wad ïa ki Khasi ha kylleng jong ka ri ban leh kumjuh kumba la leh ïa u Raja, ka HYC ka ong, “Marsien ïoh ïa kato ka khubor ka seng ka la phah sha u SP ka East Khasi Hills da kaba kyntu ïa u ban shimkam bad ban wad ïa uto u briew bad lada don pat kiba ktah ïa uwei ne arngut ki dkhot ka jaitbynriew jong ngi, ka jaitbynriew kan ym shong kli kti, namar ngim dei ki khaw pud hynrei ngi dei ka jaitbynriew kaba la pymih shibun ki khla wait ban ïaleh pyrshah ïa ki bor kiba khraw jong kane ka pyrthei.”
Ha kawei pat ka liang ka Confederation of Meghalaya Social Organizations (CoMSO) ka la ong ba ka la banjur ïa ka jingdawa ba kyrkieh jong ki na ka bynta ban pyntreikam noh ïa ka Inner Line Permit (ILP) ha Meghalaya.
“Lada la pyntreikam ïa ka ILP, ka jingwan ki briew nabar la dep ban buh ha ki jingthoh, ban buh kyndon bad buh ki jingtip shaphang jong ki,” ka la ong da kaba bynrap, “Ka ILP ka pynthikna ba kum kine ki jingjia la pynbeit lyngba ka jingshai jong ka aiñ, ym da kaba shu suba sniew.”
Na ka liang ka CoMSO ka la khot ïa u Myntri Rangbah ka jylla u Conrad K. Sangma, ba dei ban shim kam kaba khlaiñ da ka aiñ hapoh ka criminal and civil law pyrshah ïa kito kiba pynjah burom ïa ka jylla, kiba pynphriang ïa ka jingïapher jaitbynriew, bad kiba pynthut ïa ki jingtohkit lyngba ka aiñ.