Shillong, Nailur 03 : U Bah P.T.Sawkmie, MLA barim bad u vice president ka UDP u la ong ba ka rai jong ka sorkar pdeng ban pynlong ïa ka dorbar kyrpang jong ka Parliament naduh 18 haduh ka 22 tarik mynta u bnai Nailur ka la pynkyndit tyngeh ïa ka ri baroh kawei.
“Ka UCC ka dei kawei na ki ishu ne mat ba la buh ban ïakren ha ka business session bad ka UDP ka dei kawei na ka party ha ka jylla kaba la dep phah ïa ka shithi ban pyrshah ïa ka jingpyntreikam ïa ka hapoh ka jylla,” ong u bah Sawkmie.
U la pynpaw ruh ba ka law commission ka la ïoh pdiang palat ïa ka 46 lakh kiba la pynpaw ïa ka jingsngew jong ki halor ka UCC tad haduh 14 tarik u Naitung bad ka UDP ka dei kawei na kiba la pynpaw ïa ka jingsngew pyrshah jong ka.
Shuh shuh ka party ka sngewkhia bha haba ïa dei bad ka Uniform Civil Code (UCC). Ka party ka kyrmen ba u myntri rangbah ka ri u Narendra Modi un burom ïa ka jingsngew jong kiba bun ki party, ki nongïalam niam, ki riew shimet kiba la pynpaw ïa ka jingsngew jong ki ban pyrshah ïa ka UCC na ka jylla jong ka Meghalaya bad bun kiwei ki jylla ka thaiñ shatei lammihngi ka India.
Ka sorkar India ka don ka jinglah ban pyllait ïa ka jylla jong ngi namar dei tang ka Sixth Schedule kaba lah ban pyllait ïa ngi na ka UCC, ïa kaba ka sorkar India ka tip ba kane ka act ka ïada ïa ki lai jaitbynriew jong ki riewlum kum ka Nagaland, ki don ïa ka articles 371 A ban ïada ïa ki jaitbynriew Naga, bynrap u bah Sawkmie.
