Tang hapoh u snem 2021 haduh mynta 29 ngut kiba ïap ha ka jingïatyngkhuh kali ka EJHD

Khliehriat iaiong 5: U Superintendent of Police jong ka East Jaiñtia Hills District, Jagpal Singh Dhadoa, IPS, u pynpaw ka jingsngew khiah kaba khraw halor ka jingduh ei ïa ki mynsiem kiba kordor kiba ïap ha ka jingïatyngkhuh kali hapoh East Jaiñtia Hills District, ula ïathuh ruh ba tang hapoh u snem 2021 ki la don haduh 21 ngut kiba la ïap ha ki jingïatyngkhuh kali bad kat-haduh mynta u bnai jymmang 2022 lada khieñlang ki la don haduh 29 ngut kiba khlad.
Halor kine ki jingjia aksiden kali, u Jagpal Singh, u kyntu jur ïa kiba ñiah kali khamtam kito ki nongñiah kali kiba dang kham samla bad baroh kito kiba ñiah ia ki saw shaka bad ki ar shaka ba kim dei ban ñiah thurmur ïa ki kali, ym dei ban pynher stet than, ym dei ban ñiah kali haba dih kyiad, ym dei ban ñiah kali haduh ba la ima, u buh ïa kitei ki jingkyntu khnang ba kan nym buh jingma ïa ka jingim jong kiba ñiah kali bad kumjuh ruh ïa kiba shong hapoh ki kali bad ruh ba kan nym buh jingma ïa kito kiba dang ïaid ha lynti ne ha ki surok.
Lyngba u kyrwoh, u Superintendent of Police jong ka East Jaiñtia Hills District, u buh ruh ïa ka jingpynbna ba ka tnat pulit jong ka district kan shim khia ban pynlong ïa ki checking (intensive checking drive) ha baroh kawei ka district bad lada lap ïa kino kino ki nongñiah kali kiba ñiah khlemakor, kiba pynher stet ïa ki kali, kiba buaid kyiad ha ka por ñiah kali bad kino kino kiba pynkheiñ ïa ki aiñ ki kyndon ñiah kali, yn pynshitom tyngeh ïa ki katkum ka aiñ.