Tang hapoh shitaiew arsien shah tuh ka jaka buh Generator ka Secretariat

Shillong, Naiwieng, 20: Haka jingjia kaba sngew thamula, hapoh shi taïew prong ki nongtuh haka juh ka jaka ba don pyrshah ka office treikam jong ka tnad Printing and Stationary kaba don ha u Lum Secretariat, Shillong. Ka jingjia shah tuh kaba nyngkong ka la jia haka miet 13 tarik mynta u Naiwieng 2024, ha kaba ki nongtuh ki la prong jubor haka jaka ba buh ïa ki Generator ba pynbiang bording ïa ki tnad sorkar bapher bapher kiba don ha une u Lum Secretariat.
Ha kane ka jingshah tuh haka sien ba nyngkong ki runar ki la tuh tang ïa ki Wire Light kiba dei ki tama, da kaba tih ïa ka dewbilat ba tep ïa kine ki wire bad kumjuh ha ki bynta ba shapoh jong kine ki Generator la bthat ruh ïa ki wire katba ïa ki battery pat ki la iehnoh.
Ka jingshah tuh haka sien kaba ar na kane ka juh ka jaka kala jia haka step synnia jong ka 19 tarik mynta hi u Naiwieng tang hadien 6 sngi jong shah tuh haka sien kaba nyngkong. Ha kane ka sien kaba ar pat, ki nongtuh da kaba kiew ïa ka jingker jong kane ka jaka, ki la rah syndon ïa ki saw tylli ki Battery kiba ki la ieh haka sien kaba nyngkong, da kaba pynpait ïa ki tala ba khang ïa kine ki Generator, katba ïa ka tala jong ka phalor ki khlem pynpait, hynrei ki la shu kiew ïa ka kynroh bad ki nar ba ker.