Shillong, Risaw 07 : Ka Seng Samla Shnong Mawpat ha ka Sngi Saitjaiñ ka la ïoh ïa ka kali kit nongpang tang shisngi hadien ba ka la leit ban pynsngew ha u MDC ka Mawlai, Bah Teiborlang Pathaw.
Ïa kane ka ambulance ba la pynïoh na ka Chief Minister Special Development Fund (CMSDF), la pyllait paidbah da u MDC ha ka lympung ïalehkai football ba la pynlong da ka seng Samla ha kane ka sngi.
U President ka Seng Samla, u Bah Simon Kharsohtun u la ïathuh ba ka jingïakren bad u Bah Teibor ka long tang shisien ha ophis treikam jong u, bad tang shimiet ka Seng Samla ka la ïoh ïa ka jingpyntip ba ki la ïoh ïa ka ambulance da ka jingmynjur u Myntri Rangbah ban ïarap lyngba ka CMSDF.
Na ka liang u Bah Teibor Pathaw haba kren lyngkot ha kane ka Sngi, u la ong ba wat ka Mawpat kan nym don shuh ha ka Mawlai constituency, hynrei kum u nongmihkhmat ba la jied da ki paidbah na katei ka shnong un trei bad shakri beit katba ka por ka dang shah.
U MDC u la kyntu ruh ïa ki samla ba kin kiar na ki jingmlien ba sniew kiba la bam kruiñ ïa ka imlang sahlang, da kaba pynshlur ka ki ban long ka nuksa da ki kam ba bha ki ban tei ïa ka jaidbynriew.
