Nongpoh, Ïaïong, 18: Hadien ka jingwan u snem ba thymmai 2025 uba la ïaid mynta la jan saw bnai duna bad haba phai halor ki jingjia ba sngewsih la kot haduh 28 ngut ki mynsiem ba kordor kiba la duh noh ïa la ka jingim, kaba dei tang na ka daw kam aksiden kali ha Ri Bhoi District.
La ïoh ban lum jingtip halor kane ka jingduh noh ki 28 ngut ki mynsiem ba kordor na ka aksiden kali, ka dei ka jingïoh lum jingtip na ka ophis u Senior Superintendent of Police ka Ri Bhoi.
Kumba la lum jingtip na ka ophis u Senior Superintendent of Police ka Ri Bhoi, kine ki 28 ngut kiba la duh noh ïa la ka jingim na ka kam aksiden kali, ka dei ka jingjia kaba la jia ha ki kam aksiden Kali naduh u bnai Kyllalyngkot 2025 haduh mynta u bnai Ïaïong 2025 bad kiba bun jingjia ki dei ha ka surok National Highway-6 bad ha ka surok Shillong By-pass.
Dang shen la ïoh ruh ban ïa kren bad u Senior Superintendent of Police ka Ri Bhoi, u V.S Rathore, la ong ba kine ki jingjia ba sngewsih ki ju jia na ka por sha ka por ha ka surokbah ha Ri Bhoi, ka dei na ka jingdih buaid ha ka por ba ñiah Kali, ka jingpynher sted ïa ki kali bad ka jingbym burom ïa ki kyndon aiñ ñiah kali.
U V.S Rathore, u la pynthikna ruh ban tehlakam ïa kine ki jingpynkheiñ ïa ki aiñ ñiah kali, ka tnad Pulit na Ri Bhoi ka la ju pynlong ruh ïa ki jingtalasi bad ka jingkhynra ïa ki kali ba pynkheiñ bad ka thong hi ka long ban pynduna ïa ka jingjia ba sngewsih ba bun ki mynsiem kordor ki duh ïa la ka jingim tang na ka daw ka jingbym burom ïa ki aiñ ñiah kali.
Shuh shuh, u la pyntip ruh ba ka tnad Pulit ha Ri Bhoi kan dang pynkhlaiñ ban tehlakam ïa ki kali ba pynkheiñ aiñ nangne shakhmat bad ki Pulit kin dang pynlong ïa ka jingtalasi ne khynra bad kino kino kina pynkheiñ aiñ naduh ka jingpynher sted ïa ki kali, ka jingdih buaid ha ka por ba ñiah kali bad kiba pynkheiñ ïa ki aiñ kin nym lait na ka jingpynshitom kiba long katkum ki kyndon ka aiñ, u la bynrap.
