T ang hapoh ar taïew ki jingjia ki la jia ki jingjia kiba pynsngewkhia bha ïa ka imlang ka sahlang. Hapoh kine ki ar taiew ngim pat lah ban klet ïa ka jingjah rngai jong i heprit Insaphira Lyngdoh Mawnai, 14 snem ka rta na phyllaw iing lajong ha Nongrah Nonglum Dongbrei, Shillong bad la lap pat ïa ka met jong i tang hapoh 24 kynta, kata, ha ka 15 tarik, Nailur 2024 na kawei ka iing ba dang shna kaba jngai tang kumba shispah mitar na iingsah jong i. Kane ka jingjia ka la pynshaïong lut ïa kiba bun balang bad ka la buh ruh ïa u dak jingkylli uba heh bha ïa ka tnat Pulit kaba la thaw ïa ka Special Investigation Team (SIT) ba la khlieh da u SP (City) Bah Herbert Kharkongor kaba dang ïai bteng haduh mynta ban tohkit wat hadien ba la kem ïa uwei u khynnah uba dang 13 snem ka rta halor kane ka jingjia.
Hynrei tang hapoh ar taiew, ha ka 23 tarik, Nailur, 2025 la lap sa ïa kawei ka heprit kynthei ba dang 14 snem ka rta kaba la tip kyrteng kum ka Iwanpynkmen Nongsiej la lap ha u tyllai phasi ha kawei ka law bniap hajan iingsah lajong ha ka shnong Ksehkohlong, West Khasi Hills District hadien lai sngi ba ka la jah na la ing.
Dang ha ka 10 tarik mynta u bnai ka pyrthei baroh kawei ka la rakhe ïa ka World Suicide Prevention Day. Bun ki skul ki college bad ki tnat treikam bapher bapher ka sorkar hapoh ka jylla ki la rakhe ïa kane ka sngi ban pynshai bad ban pynsngewthuh ïa ki briew bad khamtam eh ïa ki khynnah bad ïa ki samla khnang ban ïada ïa ka mynsiem bakordor.
Ki lanot kim pat ïoh ïa ka jingbishar kaba hok namarba ka jingtohkit ka dang sahkut ha kti jong ki Pulit bad ka jingbishar ka dang don ha ka kti jong ki Kashari. Ka jingangnud jong ki paidbah ka long ban ïohi ba ki lanot kin ïoh ïa ka jingbishar kaba hok.
Kine ki jingjia ki sawa ha ki tyndong skhor jong kawei pa kawei ka iing ka sem bad ki kmie ki kpa ki syier mynsiem thot thot haba ïohi ïa kine ki jingjia ha ki lad pathai khubor khamtam leilei haba saphriang kine ki jingjia ha ka rynsan Social Media. Ka jingsaphriang stet ki jingjia ha ka social media ka buh jingma ïa ki khynnah kiba ïoh ban pyndonkam laitluid ïa ka mobile phone bad kan long ruh kum ka jingpynshlur lada ki kmie ki kpa kim lah ban ïada.
Ka jingsiew ka mobile phone ka pynkylla khongpong khongdeh lut ïa ka jingmut jingmut pyrkhat jong ki khyllung khynnah. Ka jinglong jingman ki khynnah ha kane ka juk mynta ka itriem bha namar ka jingaijem bad ka jingaili shaba palat ki kmie ki kpa.
Naduh ba sdang u snem haduh mynta la sakhi ïa ki jingjia ba har rukom, ka long ha ka jingpynïap briew ba shyrkhei (kumba la jia ha Sohra), ka jingshlur jong ki nongdie bad ki nongdih drok, ka jingshah thombor ki kynthei bad ki khynnah, ka jingjyllei ka tuh ka thiem, ki jingthmu rahbor ïa ki khynnah skul, ki jingshah pajut sohskhor ki khynnah skul, ki la long ki jingjia kiba pynsngewkhia bha ïa ka imlang ka sahlang.
Watla ki bor shnong bad ki bor ka aiñ ki peitngor ïa ka jinglong jingman hynrei ki nongleh kam bymman kim sheptieng satia ïa ka aiñ bad la i kumba ki kynjri jong ka aiñ ki synjor bha haduh katta katta ban teh ïa ki nongleh kam sniew kiba pynwit bad kiba pynsyier mynsiem haduh katta katta ïa ki longing longsem.
Ïano yn kynnoh? Lada ki longiing longsem kim long kiba pyrkhing bad kiba buh tyngkai ïa u dieng sympat ka lawei kaba dum ka la ap lypa ïa ka ïing ka sem ban mad ïa ka jingjah burom hadien habud.
