Shillong, Nohprah 18: U Myntri Rangbah ka jylla u Conrad K Sangma ha ka sngi u Blei uba la ai jingkren ha jingrakhe ïa ka Jubili Ksiar jong ka North Eastern Council (NEC) kaba la pyllong ha Madan Polo ha kaba la wan shim bynta da u Myntri Rangbahduh ka ri u Narendra Modi, u Myntri kam poh ïing ka sorkar pdeng u Amit Shah, la sakhi ba ha ka jingkren u Myntri Rangbah ka jylla u la buh ka jingkyrpad ba ka sorkar pdeng kan pynurlong noh ïa ka jingangnud kaba ki nongshong shnong ka jylla ki angnud ba ka ktien Khasi bad Garo kan ïoh jingithuh noh kum kawei na ki ktien ha ka Khyrnit ba phra ka riti syshar ka ri.
Ha ka jingkren jong u, u Myntri Rangbah u la kren thik halor ka roi ka par kaba la lah ban pynurlong ha kine ki snem kiba la dep bad kumjuh ïa kiba dang sahteng kiba ka sorkar ka buh jingmut ban pynurlong noh bad u kren de halor ka ktien Khasi katba tang shi kyntien ruh ka kyntien ban pynkynmaw halor ka ILP kaba la sakhi ba ka don ka jingangnud kaba khraw bad kumjuh kaba la mih la ruh bun bun sien ki jingïakhih na bynta kane ka jingdawa ILP, hynrei u Myntri Rangbah um shym la kren eiei halor ka ILP ha kane ka jingwan ki mynti sorkar pdeng khamtam hakhmat u Modi bad u Amit Shah.
U Myntri Rangbah haba kren halor ka roi ka par kaba ka sorkar ka angnud ban pyndep, u la buh ka jingkyrpad ba ka sorkar pdeng kan ai jingkyrshan ïa ka jylla na bynta ban pynkylla ïa ka nongbah Shillong kum ka ktem bad ka pdeng ka pule puthi jong ka thaiñ Lam Mihngi.
U la ong ruh ba ka sorkar jylla hapoh ka jingïalam jong u ka pynleit jingmut kyrpang na bynta ki samla ka jylla ha kaba ka ai jingkyrshan ïa kito kiba donsap ha ka rwai ka siaw, ka put ka tem, ka seng kam seng jam, ka kam lehkai lyngba ki skhim jong ka.
U la ong ruh ba na ka liang jong ka sortkar ka trei khlem shongthait na bynta ban kynjoh sha ka thup kum kawei na ki jylla kaba kiew sted. “Tang hapoh san snem ngi la ïoh ka jingithuh na ka United Nations kum kata ka jylla kaba la kiew ha ka Digital Governance bad ruh ka jingkyntiew ïa ki jaka jngoh kai ha ki jaka nongkyndong, nalor kane ngi la ïoh jingithuh ruh kum ka jylla kaba kiew shakhmat duh ha ka jingpyntrei ïa ki skhim ka sorkar pdeng kiba kynthup ïa ka Jal Jeevan Mission, PMGSY, MGNREGS bad kiwei ki skhim kiba dei ha ka koit ka khiah,” u la ong.
U la ong ruh ba ka sorkar hapoh ka jingïalam jong u ka la lah ban pynurlong ïa kiba bun ki projek kiba ki sorkar kiba rim kim shym la lah ban pynurlong kum ïa ka jingtei ïa ka 5-star hotel ka Taj Vivanta, ka Marriott hotel bad ka Ganol Hydroelectric Power project, bad kiwei kiwei pat ki jingtei kiba la sahteng da ki bun bun snem.
