Nongpoh, Ïaiong 13: Lada ki kyntien ba la khlei da u Symbut Myntri Rangbah ka jylla, u Prestone Tynsong kin urlong kumba u la dep ban pynpaw paidbah hynnin ka sngi ha Nongpoh, kan long ka jingkyrkhu kaba khraw na ka bynta ki paidbah nongshong shnong ka Ri Bhoi ba kin ioh noh ïa kita ki surok kiba la bit la biang khamtam ki surok kiba kham donkam tam ha Ri Bhoi District..
Haba kren kum u Symbut Myntri Rangbah ka jylla lane u National Vice President ka NPP party, ban pdiang sngewbha ïa ki nongïalam ka Congress, BJP bad UDP sha ka sem jong ka NPP Party, u Prestone Tynsong u la ïathuh ba ka sorkar MDA ba la lamkhmat da ka NPP party ka la dep ban mang haduh Rs. 6500 klur tang na ka bynta ban shna ïa ki surok ha ka jylla hadien ba la synshar da ka MDA government bad u la pyntip ruh ba ka Ri Bhoi ruh ka dei kawei na ka District kaba la ioh jingmyntoi namar tang ha Ri Bhoi ruh la dep ba mang pisa palat ïa ka Rs. 1000 klur ban shna ïa ki surok paidbah.
U la ïathuh ruh ba ka surok na Nongpoh-Umden bad ban pynïasoh shaduh sha Sonapur la de ban mang haduh Rs. 80 klur ban siang rong ne pynbha ïa kane ka surok bad shen yn pynlait noh ïa ka tender bad ha kaba ïa dei bad ka surok na Umsning-Mawhati ban pynïasoh shaduh sha Umsiang ruh la dep ban mang pisa bad ban pynlait noh ïa ka worker order sa tang ban pyntrei da ki Contractor.
Ha kaba ïa dei bad ka surok na Umling sha Umrit ruh ka kam ka la ïaid shaid shaid bad ka surok na Mairang sha Patharkhmah bad ban mih sha Ranibari sha ka jylla Assam ruh ka kam ka la ïaid shaid shaid bad bun ki surok ka sorkar MDA ka la dep ban mang pisa bad kaba sah mynta sa tang ban pyntrei ïa ka kam ba kane ka jingioh ïa kane ka mang tyngka kan sa long ka jingkyrkhu na ka bynta ki paidbah ka Ri Bhoi.
Shuh shuh, kumba kiwei nongïalam na ka Congress, BJP bad UDP ki la wan ban pynïasoh sha ka NPP party, u Bah Prestone Tynsong u la kyrpad ruh ïa ki paidbah ka Ri Bhoi ba kin phai khmat noh sha ka NPP party bad lada ka NPP ka wan ha ka bor ha ka election 2023 ban sa long ha ka jylla bun ki kam pynroi kin dang tuid sha kane ka District kaba long ka jingkyrkhu na ka bynta ki paidbah ka Ri Bhoi, u la bynrap.
